فېروزکوه (پژواک، ۶ وږی ۱۴۰۳): د غور ځايي مسوولین وايي، د غور – هرات لویه لار چې د سېلاب له امله د دغه ولایت په «رده بندان» سیمه کې ویجاړه او د ترافیکو پر مخ تړل شوې وه، بېرته د تګ راتګ پر مخ پرانیستل شوه.
د غور د ټولګټو رییس مولوي عبدالکریم پژواک خبري اژانس ته وویل چې دغه لاره د سیمهییزې ادارې او خلکو په ملاتړ بېرته د موټرو د تګ راتګ پر مخ پرانیستل شوې ده.
هغه زیاته کړه: «د دغه ولایت د ځايي ادارې د رهبرۍ د پرلهپسې هڅو په ترڅ کې د غور ټولګټو ریاست د خلکو په همکارۍ وکولا شول د غور – هرات لویه لار چې د وروستیو سېلابونو له امله د دغه ولایت په دره بیدان او د شهرک ولسوالۍ په کمنج کلي کې د ترافیکو پر مخ تړل شوې وه، بېرته پرانیزي.»
بلخوا، د باروړونکو او مسافر وړونکو موټرو ځیني چلوونکي د ځايي مسوولینو له دغه اقدامه هرکلی کوي او وايي، له دې مخکې یې په سختۍ سره د «جلګه مزار» له لارې هرات ولایت ته تګ راتګ کاوه.
د غور - هرات پر لویه لار د یوه مسافر وړونکي موټر چلوونکي وکیلاحمد وايي: «سېلابونو ډېری سړکونه خراب کړي، څلور میاشتې کېږي چې موږ د جلګه مزار له لارې هرات او له هراته غور ته مسافرین راوړو، ډېر په مشکلاتو، لاره اوږده او خرابه ده، دا چې دغه لار خلاصه شوه، مننه کوو.»
په همدې حال کې، د یوه باروړونکي موټر چلوونکي عبدالبصیر رحیمي هم د یادې لارې له پرانیستل کېدو خوښ دی او وايي چې خپل مقصد ته تر رسېدو به یې څو شپې او ورځې سفر کاوه.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن