کونړ کې د لس‌نیم میلیونه افغانیو په لګښت د اوبو رسولو د دوو شبکو جوړېدو چارې پیل شوې

اسعداباد (پژواک، ۲۷ وږی ۱۴۰۳): د کونړ د کلیو بیارغونې او پراختیا ریاست په همغږۍ «د اسلامي هوساینې نړۍوالې موسسې» په مالي همکارۍ نن د دغه ولایت په سرکاڼو ولسوالۍ کې د پاکو اوبو رسولو د دوو شبکو جوړېدو چارې پیل شوې.

د یادو پروژو د پیل په موخه جوړو شوو مراسمو کې د کونړ د کلیو بیارغونې او پراختیا رییس شمس‌الرحمن سېلاب وویل، د یادو شبکو په جوړېدو سره به د سرکاڼو ولسوالۍ نږدې ۶۰۰ کورنیو ته د څښاک پاکې برابرې شي.

د هغه د معلوماتو له مخې، پر دغو پروژو لس‌نیم میلیونه افغانۍ لګښت راځي چې «د اسلامي هوساینې نړۍ‌والې موسسې» له لوري ورکول کېږي.

هغه وویل: «زه مننه کوم د اسلامي هوساینې نړۍوالې موسسې څخه چې زموږ په وړاندیز یې هغو کورنیو ته د څښاک پاکو اسانتیاوې برابرې کړې چې پخوا یې نه لرلې.»

هغه زیاته کړه، له نړۍوالو خیریه موسسو سره یې په ګډه هڅې پیل کړې دي چې د کونړ په نورو هغو سیمو کې چې خلک یې د څښاک پاکو اوبو ته لاسرسی نه لري، ورته شبکې جوړې کړي.

په همدې حال کې د سرکاڼو ولسوالۍ د سېرو او شامیرکوټ سیمو اوسېدونکي هم خوښ دي چې د څښاک د پاکو اوبو رسولو شبکې ورته جوړېږي.

د شامیرکوټ اوسېدونکي سید عاقل‌شاه وویل: «خوښ یم چې په سیمه کې راته د څښاک اوبو اسانتیاوې برابرېږي، موږ د اوبو په تېره د څښاک اوبو د کمښت له ستونزو کړېدو چې د دې شبکو د جوړېدو پر مټ به مو دا ستونزه اوس حل شي.»

دوی له حکومت او مرستندویه ادارو غوښتنه وکړه چې په دغه برخه کې خپلو هڅو ته دوام ورکړي او د کونړ په ټولو سیمو کې خلکو ته د څښاک پاکو اوبو ته د لاسرسي زمینه برابره‎ کړي.