کابل (پژواک، ۱۲ تله ۱۴۰۳): د لوړو زده کړو وزارت وايي، د کابل ښار پوليتخنیک پوهنتون کې د ۱۲۹ میلیون افغانیو په ارزښت د ۲۲ بېلابېلو پروژو چارې پیل شوې.
د لوړو زده کړو وزارت سرپرست مولوي نداء محمد ندیم په دې تړاو جوړه شوې غونډه کې ویلي، مخکې به خلک د نا امنیو شاهدان وواو نن ورځ د هېواد په کچه د لویو پروژو د پرانیستې شاهدان دي.
هغه ویلي، د دغه وزارت له علمي او زېربنایي پروژو څخه ملاتړ کړی او په عمل کې یې ثابت کړی دی.
همدارنګه د لوړو زده کړو سرپرست وزیر له استادانو او محصلینو وغوښتل چې د ډلو او جریانونو د منفي تبلیغاتو تر اغېزې لاندې رانشياو د علم پر زده کړه تمرکز وکړي.
د کابل پوليتخنیک پوهنتون سرپرست انجنیر سردار ولي صالحي ویلي، چې په دغو پروژو کې د ودانیو ترمیم او بیارغونه، د لابراتوارونو اودفترونو تجهیز،د لیلیې محصلینو د البسې تدارک، د خوړنځای تجهیز او د یاد پوهنتون د ۸ پوهنځيو د اړتیا وړ کتابونو تهیه او تدارکشامل دي.
یاد وزارت د جزییاتو له ورکولو پرته لیکلي، په یادو ۲۲ پروژو ۱۲۹ میلیون افغانۍ لګښت راځي.
د یادونې وړ ده چې د کابل پوليتخنیک پوهنتون د هېواد له سترو پوهنتونونو څخه دی، چې په انجنیري څانګو کې فعالیت کوي او هر کالسلګونه انجنیران ټولنې ته وړاندې کوي.
