د هېواد په ۱۴ ولایتونو کې د سخت ورښت اټکل شوی

کابل (پژواک، ۱۳ تله ۱۴۰۳): د ترانسپورټ او هوایي چلند وزارت د هېواد په ۱۴ ولایتونو کې د سختو ورښتونو او سېلابونو راتلو خبر ورکړی دی.

دغه وزارت نن پر خپله اېکس‌پاڼه لیکلي چې د روانې میاشتې په ۱۳ او ۱۴مه د سالنګونو په ګډون بدخشان، نورستان، کونړ، ننګرهار، لغمان، کاپیسا، پنجشېر، بغلان، پروان، کابل، لوګر، پکتیا، خوست او غور ولایتونو کې د سختو بارانونو او سېلابونو راتلو اټکل کړی دی.

سرچینه وایي چې په ځینو ځایونو کې د ورښت اندازه له ۱۵ تر ۴۰ ساتني مترو پورې اټکل شوې ده.

دغه وزارت لیکلي چې د سالنګونو په ګډون د شمال، لوېدیځ، سوېل‌ختیځو، ختیځو او مرکزي ولایتونو کې له خاورو او دوړو سره مل د نسبتاً شدیدو بادونو احتمال هم شته چې سرعت یې په ساعت کې له ۵۰ تر ۸۰ کیلومترو پورې اټکل شوی دی.