لوګر کې د نهو کاریزونو د بیارغونې چارې پيل شوې

<p style="text-align: justify;">پل‌علم (پژواک، ۵ لېندۍ ۱۴۰۳): د لوګر سیمه‌ییز چارواکي وایي، د یونېسکو سازمان په همکاري د دغه ولایت په مرکز پل‌علم، محمداغې او بره‌کي برک ولسوالیو کې د نهو کاریزونو د بیارغونې چارې پيل شوې چې سل زره امریکايي ډالره لګښت ورباندې راځي.</p>

<p style="text-align: justify;">د لوګر ولایت د سیندیزې حوزې ریيس ملا محمد اسماعیل اخندزاده په همدې موخه جوړې شوې غونډې ته وویل، دغه کاریزونه د یونېسکو نړۍوال سازمان په مالي ملاتړ د راتلونکو شپږو میاشتو په موده کې بیارغول کېږي چې له پرانیستې سره سم به یې ۱۲ سوه جریبه کرنیزه ځمکه خړوبه شي.</p>

<p style="text-align: justify;">د هغه په خبره، یاد کاریزونه په مرکز پل‌علم، محمداغې او بره‌کي برک ولسوالیو کې دي چې سل زره امریکايي ډالره لګښت ورباندې راځي.</p>

<p style="text-align: justify;">نوموړي وویل، په یادو پروژو کې به سلګونه کسانو ته د کار زمینه هم برابره شي.</p>

<p style="text-align: justify;">ورته مهال، د دغه ولایت یوه اوسېدونکي محمدحسن پژواک ته وویل، خوښ دی چې د لومړي ځل لپاره د یونېسکو له لوري په دغه ولایت کې د اوبو کاریزونو د بیارغونې چارې پيل شوې.</p>

<p style="text-align: justify;">هغه وویل، د یادو پروژو له بشپړېدو سره به په مرکز او ولسوالیو کې وچ شوې کاریزونه تازه شي او د کرکېلې ترڅنګ به بڼوالۍ ته هم په کافي اندازه اوبه برابرې کړي.</p>

<p style="text-align: justify;">د یادونې ده، همدا تېره میاشت د ملګرو ملتونو د خوړو او کرنې نړۍوال سازمان (FAO) له لوري د دغه ولایت په مرکز او محمداغې ولسوالي کې د درېیو لویو کانالونو د بیارغونې چارې پيل شوې</p>