کابل (پژواک، ۱۱ لېندۍ ۱۴۰۳): د قطر مستشار د کار او ټولنیزو چارو سرپرست وزیر ته بلنه ورکړې ترڅو دغه هېواد ته د افغان ماهرو کارګرو د قانوني استولو برخه کې د هوکړهلیک د پلې کېدو په موخه دوحې ته سفر وکړي.
د افغانستان د کار او ټولنیزو چارو وزارت د ۱۴۰۱ کال لړم په میاشت کې ویلي چې د یوه تړون له مخې، به ۶۵ زره افغانان د کار لپاره بهرنیو هېوادونو ته واستول شي. یاد وزارت ویلي وو، بهرنيو هېوادونو ته د کارګرو د لېږلو تړونونه د تېر نظام پر مهال لاسليک شوي وو چې تطبيق يې د ځينو ستونزو له امله ځنډېدلی وو.
د کار او ټولنیزو چارو وزارت په خبرپاڼه کې راغلي چې د دغه وزارت سرپرست ملا عبدالمنان عمري د قطر شاهي هېواد له مستشار ډاکټر مردیف علي القشوتي سره وکتل.
سرچینې لیکلي، دې کتنه کې د دواړو هېوادونو ترمنځ د استراتیژیکو همکاریو د پیاوړتیا سربېره؛ قطر هېواد ته د افغان ماهرو کارګرو د قانوني استولو برخه کې د ترسره شوو پرمختګونو او اقداماتو په اړه معلومات شریک شول او په دې برخه کې د شته هوکړهلیک د غنامندۍ، بشپړ او غوره پلې کېدو په موخه د ګډو کمېټو پر جوړېدو ټینګار وشو.
خبرپاڼه کې راغلي، عمري افغانانو ته د کارموندنې او ټولنیزو خدماتو وړاندې کولو برخو کې د ګډو پروژو په لاره اچولو لپاره چمتووالی څرګند کړ.
هغه ویلي، دا چې په افغانستان کې بشپړ امنیت ټینګ او مختلفو ساحو کې د پانګېاچونې لپاره فرصتونه برابر دي، نو غوره به وي چې قطري پانګوال دې افغانستان کې د پانګونې سربېره هغه هېواد ته د کندهار انارو په مخامخ صادراتو کې هم هڅه وکړي.
یاد وزارت لیکلي: «مردیف علي القشوتي خپلو خبرو کې د دواړو دوستو هېوادونو ترمنځ له نېکو اړیکو څخه په یادونې سره د قطر هېواد ته د راتلونکي میلادي کال د جنورۍ په ۱۳مه او ۱۴مه نېټه رسمي بلنه د کار او ټولنیزو چارو وزارت سرپرست ته وړاندې کړه، ترڅو په نږدې راتلونکي کې یاد هېواد ته رسمي سفر ترسره او د کارګرو د اعزام برخه کې د هوکړهلیک د تطبیق په منظور له خپل قطري سیال سره له نږدې وګوري او په اړه یې بحثونه وکړي.
د یاد وزارت د معلوماتو له مخې، د قطر هېواد سفیر د کار او ټولنیزو چارو سرپرست وزیر او مل پلاوي ته د هغه هېواد د ملي ورځې په جشن کې د ګډون بلنه هم ورکړه چې د ډسمبر په ۱۸ نمانځل کېږي.
GET IN TOUCH
NEWSLETTER
SUGGEST A STORY
PAJHWOK MOBILE APP