میدان‌وردګو کې د دوو دښمنو کورنيو ترمنځ روغه وشوه

<p style="text-align: justify;">غزني ښار (پژواک، ۱۹ مرغومی ۱۴۰۳): د میدان‌وردګو ولایت په مرکز کې د دوو دښمنو کورنیو ترمنځ پنځه کلنه دښمني ختمه شوه.</p>

<p style="text-align: justify;">د میدان‌وردګو د امنیې قوماندانۍ ویاند محمدیوسف اسرار پژواک خبري آژانس ته وویل، د مرکز ميدان‌ښار د ابراهيم‌خېلو په سیمه کې د دوو کورنيو ترمنځ دښمني د قومي مشرانو، مخورو او حکومتي مسوولینو په هڅو حل شوه.</p>

<p style="text-align: justify;">دی وايي چې دغه دښمني د قتل پر سر رامنځته شوې وه او پنځه کاله یې دوام وکړ.</p>

<p style="text-align: justify;">هغه وویل، تېره شپه د يادو کورنيو مشرانو او کشرانو يو بل ته د مينې او پخلاينې غېږې ورکړې او ژمنه يې وکړه چې له دې وروسته به په سوله کې ژوند کوي.</p>

<p style="text-align: justify;">نوموړي زیاته کړه، حکومت هڅه کوي چې په دغه ولايت کې ټولې دا ډول دښمنۍ پای ته ورسوي.</p>

<p style="text-align: justify;">په همدې حال کې، د دغې سيمې قومي مشران او سپين‌ږيري وايي چې د دا ډول شخصي دښمنيو او شخړو حل د خلکو ترمنځ د يووالي لامل ګرځي او د بدبختيو مخه نیسي.</p>

<p style="text-align: justify;">د سیمې یوه قومي مشر حبیب‌الله پژواک ته وویل، حکومت او قومي مشران بايد د دغه ډول دښمنيو مخنيوی وکړي او د روغو جوړو له لارو دغه شان ستونزو ته حل پیدا کړي.</p>

<p style="text-align: justify;">هغه وویل، شخړې خلک بدمرغه کوي، ژوند يې له ګواښ سره مخ کوي او په ټولنه کې ستونزي رامنځته کوي.</p>

<p style="text-align: justify;">ورته وخت کې، دواړو ښکېلو لورو خوښي څرګنده کړه او له مسوولینو او مصلحینو یې مننه وکړه چې د دوی ترمنځ یې روغه وکړه.</p>

<p style="text-align: justify;">د یادونې ده، له دې مخکې هم د دغه ولایت په مرکز او ولسوالیو کې یو شمېر داسې شخړې د سیمې د قومي مشرانو او مسوولینو په منځګړیتوب حل شوې دي.</p>