کونړ کې د قیمتي او نیمه‌قیمتي ډبرو د پلور مرکز پرانیستل شو

اسعداباد (پژواک، ۲۴ مرغومې ۱۴۰۳): سیمه‌ییز مسوولین وایي، د کونړ په مرکز اسعداباد ښار کې د قیمتي او نیمه‌قیمتي ډبرو د پلور مرکز پرانېستل شو او په لومړي ځل پکې د ۱۴ میلیونه افغانیو په ارزښت بیروج د بولۍ له لارې وپلورل شول.

د کانونو او پټرولیم وزارت مرستیال شیخ ضیاالرحمن نن په دې اړه جوړه شوې غونډه کې وویل چې په اسعداباد ښار کې اړتیا ته په کتو او د سوداګرو په غوښتنه د قیمتي او نیمه قیمي ډبرو د خرڅلار مرکز پرانیستل شو.

ده وویل، دا مارکېټ به د اقتصادي پلوه نه یوازې د سوداګرو په ژوند مثبت اغیز وکړي، بلکې د ټول هېواد اقتصاد به ورسره ښه شي.

هغه زیاته کړه، اسلامي امارت هڅه کوي چې په ټول هېواد کې د قیمتي او نیمه قیمتي کاڼو کانونه په فني او مسلکي ډول استخراج کړي څو هېوادوالو ته ډیره ګټه په لاس ورشي.

د کونړ والي مولوي قدرت ابوحمزه وویل، کونړ د هېواد یو له هغو ولایتونو دی چې د قیمتي او نیمه قیمتي ډبرو بې‌شمېره کانونه پکې شته او اړتیا ده چې په فني ډول یې کېدنه وشي.

هغه د کانونو او پټرولیم وزارت له راغلي پلاوي غوښتنه وکړه چې د قیمتي او نیمه‌قیمتي کاڼو د خرڅلاو په جوړ شوي مارکېټ کې د کاڼو د پروسس اسانتیاوې هم رامځته کړي.

د قیمتي ډبرو یوه سوداګر حاجي قریب‌الله هلال وایي: «موږ خوښ یو چې په لومړي ځل کونړ کې د قیمتي او نیمه قیمتي ډبرو د ځرڅلاو مارکیټ جوړ شو چې سم د واره په کې د ۱۴ میلیونه افغانیو په ارزښت د بیروجو غمیو پلور وشو.»

هغه  له اسلامي امارته غوښتنه وکړه چې سوداګرو ته اسانتیاوې رامځته کړي څو له قانوني لارو له بهرنیو سره د قیمتي کاڼو د پېر او پلور چاره ترسره کړي.