کابل (پژواک، ۳ سلواغه ۱۴۰۳): افغانستان کې د چین سفیر «د شانګهای همکاریو سازمان د ۲۰۲۵ کال انلاین محصول او د شانډونګ پرمختللې سوداګرۍ» تر عنوان لاندې د غونډې پرانیستغونډې ته وینا وکړه او په دغه سازمان کې یې د افغانستان د ناظر په توګه بیاغړیتوب وغوښت.
د چین په بجینګ ښار کې د افغانستان سفارت نن پر خپله اېکسپاڼه لیکلي، بلال کریمي «د شانګهای همکاریو سازمان د ۲۰۲۵ کال انلاین محصول او د شانډونګ پرمختللي تجارت» تر عنوان لاندې غونډې د پرانستې مراسمو کې وینا وکړه.
کریمي په یاده ناسته کې د اقتصاي، سوداګریزو، ترانزیټي او فرهنګي اړیکو او په یاد سازمان کې د افغانستان د ناظر په توګه د بیاغړیتوب په اړه خبرې وکړې.
سرچینې لیکلي، کریمي د سازمان د غړو هېوادونو ترمنځ د صادراتو او وارداتو د لېږد رالېږد اهمیت ته په اشاره چین ته د افغانستان د کرنیزو محصولاتو او صنعتي تولیداتو د ګڼ شمېر اقلامو صادرولو پر وړاندې د خنډونو د له منځه وړلو، په چین کې افغان سوداګرو ته په نندارتونونو کې د اسانتیاوو برابرولو، د بندرونو او ترانسپورټي شبکو برخه کې د پراختیا او اسانتیاوو رامنځته کولو او یو لړ نورو مسایلو په اړه خبرې وکړې.
د سرچینې د معلوماتو له مخې، کریمي د غونډې په حاشیه کې د یاد سازمان د عمومي منشي له مرستیال او نورو مشرانو سره په انفرادي توګه هم لنډې لیدنې کړې دي.
