کابل (پژواک، ۸ سلواغه ۱۴۰۳): د راپورونو له مخې، د اسرائیل او لبنان ترمنځ اوربند به د روان کال د فبرورۍ میاشتې تر ۱۸مې دوام ولري.
د رویټرز د راپور له مخې، سپینې ماڼۍ اعلان کړی چې د لبنان او اسراړیل ترمنځ هوکړه د امریکا متحده ایالتونو تر څارنې لاندې ده او د ۲۰۲۵ کال د فبرورۍ تر ۱۸مې به دوام ولري.
سپینې ماڼۍ دغهراز ویلي، د لبنان اسرائیل او متحده ایالتونو دولتونه به «۲۰۲۳ کال د اکټوبر له ۷مې څخه وروسته د نیول شوو لبناني بندیانو راستنولو» په اړه مذاکرات پیل کړي.
ورته مهال، لبناني چارواکو اعلان کړی چې د مخکنۍ هوکړې له پای ته رسېدو وروسته اسرائیلي ځواکونو د دغه هېواد په سوېل کې ۲۲ کسان وژلي دي.
د راپور له مخې، د لبنان پوځ ویلي چې د اسرائیلي ځواکونو له لوري د یکشنبې ورځې وژل شوو کسانو کې د دوی یو سرتېری هم لیدل شوی دی.
