د هلمند امنیه قوماندانۍ لپاره د ۷۵ میلیون افغانیو په ارزښت نوې ودانۍ جوړېږي

لښکرګاه (پژواک، ۲۳ سلواغه ۱۴۰۳): د هلمند سیمه‌ییز مسوولین وايي چې په مرکز لښکرګاه ښار کې د دغه ولایت د امنیه قوماندانۍ لپاره د ۷۵ میلیون افغانیو په ارزښت د نوې ودانۍ جوړولو چارې پيل شوې.

د هلمند ولایت د امنیه قوماندانۍ ویاند ملا عزت‌الله حقاني پژواک خبري اژانس ته وویل، نوې ودانۍ د لښکرګاه ښار د زړي قوماندانۍ په سیمه  کې جوړېږي .

هغه زیاته کړه،  د دې ودانۍ د جوړولو لپاره د کورنيو چارو وزارت له لوري ۷۵ ميلیونه او ۶۰۰ زره افغانيو په ارزښت بودجه ځانګړې شوې او د ۱۵ میاشتو په موده کې به یې چارې بشپړې شي.

نوموړي زیاته کړه، ياده ودانۍ به درې پوړيزه وي او د اداري شعبو تر څنګ به د غونډو تالار، مېلمستون او اړونده ملحقات هم ولري چي په دې سره به د امنيه قوماندانۍ په اداري چارو کي لا زیاتي اسانتياوي رامنځته شي.