خیرخواه: د جهادي اثارو د ساتنې لپاره جهادي ارشیف جوړېږي

کابل (پژواک، ۳ وږی ۱۴۰۴): د اطلاعاتو او فرهنګ وزیر وایي، د «جهادي اثارو» د ساتنې په موخه د جهادي موزیمونو سربېره «جهادي ارشیف» هم جوړېږي.

د اطلاعاتو او فرهنګ وزارت په یوه خبرپاڼه کې ویلي، د دغه وزارت وزیر ملا خیرالله خیرخواه د جوزجان له والي قاري ګل حیدر شفق سره لیدلي دي.

په دې لیدنه کې د جوزجان والي د دغه ولایت د اطلاعاتو او فرهنګ ریاست د فعالیتونو، د «جهادي اثارو» د ساتنې په موخه د «جهادي موزیم»، د فیض‌اباد ولسوالۍ د عامه کتابتون د ودانۍ جوړېدو او د اطلاعاتو او فرهنګ ریاست اړوند ځمکو د ابادولو په اړه خبرې کړې دي.

په خبرپاڼه کې ویل شوي چې د جوزجان والي دغه‌راز په دغه ولایت کې د سیلانیانو لپاره د اسانتیاوو برابرولو او د ځوانانو پر وړاندې د شته ستونزو د حل په اړه هم بحث کړی دی.

د اطلاعاتو او فرهنګ وزیر ډاډ ورکړی چې یادو موضوعاتو ته به رسېدنه وشي.

نوموړي ویلي، د «جهادي اثارو» د ساتنې لپاره د «جهادي موزیمونو» جوړولو ترڅنګ «جهادي ارشیف» هم جوړ شي او د جهاد او تېرې مبارزې تاریخ به هم ولیکل شي.

په خبرپاڼه کې د دغو موزیمونو او ارشیف جوړېدو د ځای په اړه معلومات نه دي وړاندې شوي.