ایراني رسنۍ: هرمز تنګي ته نږدې د امریکا پر یوې پوځي کښتۍ توغندیز برید شوی

<p style="text-align: justify;">کابل (پژواک، ۱۴ غویی ۱۴۰۵): د راپورونو له مخې، هرمز تنګي ته نږدې د امریکا پر یوې پوځي کښتۍ وروسته له هغه توغندیز برید شوی چې د ایراني ځواکونو خبرداری یې له پامه غورځولی و.</p>

<p style="text-align: justify;">د فارس خبري اژانس د راپور له مخې، دوه توغندي جاسک ټاپو ته نږدې سیمه کې د امریکا پر یوې لویې پوځي کښتۍ لګېدلي دي؛ ویل کېږي چې دغې کښتۍ د ایراني ځواکونو خبرداری له پامه غورځولی و.</p>

<p style="text-align: justify;">په راپور کې راغلي چې دغه امریکايي کښتۍ د دغو بریدونو له امله له حرکت لوېدلې او اړه شوې چې شاتګ وکړي او له سیمې وتښتي.</p>

<p style="text-align: justify;">سرچینه زیاتوي چې ایران له دې مخکې څو ځلې اعلان کړی چې له رسمي اجازې پرته د هرمز تنګي له لارې هیڅ ډول تګ راتګ نه شی کېدای او د دغه خبرداري له پامه غورځول به د وسله‌والو ځواکونو له سخت غبرګون سره مخ شي.</p>

<p style="text-align: justify;">د ایران دولتي ټلویزیون هم ویلي چې د دغه هېواد سمندري ځواکونو هرمز تنګي ته د «امریکايي - صهیونیستي» کښتیو د ننوتلو مخه نیولې ده.</p>

<p style="text-align: justify;">دا په داسې حال کې ده چې د امریکا ولسمشر ډونالډ ترمپ نن سهار ویلي وو چې هېواد یې له دوشنبې ورځې هرمز تنګي کې د بندو پاتې کښتیو د ازادولو لپاره اقدام کوي.</p>

<p style="text-align: justify;">په همدې حال کې ایراني پوځي چارواکو خبرداری ورکړی چې د بهرنیو ځواکونو، په ځانګړي ډول د امریکايي ځواکونو هر ډول ننوتل به په هرمز تنګي کې له پوځي غبرګون سره مخ شي.</p>

<p style="text-align: justify;">ویل کېږي چې د جګړې له پیله راهیسې ایران د فارس خلیج په اوبو کې د کښتیو د تګ راتګ لویه برخه درولې چې دې چارې د نړۍ د نفت او ګازو پر لېږد هم د پام وړ اغېز کړی دی.</p>

<p style="text-align: justify;"></p>