کابل (پژواک، ۲۵ وږی ۱۴۰۵): د راپورونو له مخې، د امریکا په لاسانجلس ښار کې د یوې ټلوېزیوني شبکې اړوند هلیکوپټر د لوېدو او اور اخیستو له امله درې کسان مړه او یو بل ټپي شوی دی.
اسوشیټیډ پرېس خبري اژانس راپور ورکړی چې دا پېښه نن د کابل پر وخت له سهار ۶:۳۰ بجو لږ مخکې د لاسانجلس د سنفرناندو درې په «چټسورث» سیمه کې رامنځته شوې ده.
د راپور له مخې، هلیکوپټر د «اېنبيسي ۴ لاسانجلس» (NBC4 Los Angeles) ټلوېزیوني شبکې اړوند و او په هماغه سیمه کې یې د یوې ترافیکي پېښې د خبري پوښښ پر مهال سقوط وکړ.
د لاسانجلس د اوروژنې ادارې ویلي چې د هلیکوپټر له لوېدو وروسته اور ولګېد او څلور موټر او دوه کانټینرونه هم وسوځېدل؛ د اور مهارولو لپاره تر ۵۰ ډېر اوروژونکي سیمې ته استول شوي وو.
د یادې ادارې په وینا، د مړو له ډلې د یوه کس جسد د یوه سوداګریز تعمیر په بهرني انګړ کې موندل شوی؛ خو لا روښانه نه ده چې دوه نور مړه شوي کسان د هلیکوپټر دننه وو او که د پېښې په ځای کې موجود وو.
دغهراز، یو بل کس روغتون ته لېږدول شوی، خو د روغتیايي وضعیت په اړه یې جزییات نه دي ورکړل شوي.
اسوشیټیډ پرېس لیکلي چې د هلیکوپټر تر لوېدو شاوخوا دوه ساعته مخکې په همدې سیمه کې یو موټر له ښاري بس سره ټکر کړی و چې له امله یې دوه کسان مړه او شپږ نور ټپیان شوي وو. د ټلوېزیوني شبکې هلیکوپټر د همدې پېښې د خبري پوښښ لپاره سیمې ته تللی و.
