کابل (پژواک، ٢٧ غبرګولی ۱۴۰۵): د افغانستان کرکټ ملي لوبډلې د درېیو یو ورځنیو نړیوالو سیالیو په دویمه لوبه کې له هند څخه ماتې وخوړه.
نننې لوبه چې په هند کې ترسره شوه پچه یې افغان لوبډلې وګټله او لومړۍ یې د توپ اچونې پرېکړه وکړه.
په دغه لوبه کې د هند کرکټ ملي لوبډلې لومړۍ توپوهنه ترسره کړه او په ٥٠م اور کې د ټولو لوبغاړو په سوځېدو سره یې ٤٠٢ منډې وکړې.
د افغانستان له لوري په توپ اچونه کې ننګیال خروټي څلور، راشد خان درې، سلیم ساپي او الله محمد غضنفر د هند يو_ یو لوبغاړي وسوځول.
افغان لوبډلې ورکړل شوې هدف پوره نه کړای شو او په ٤٥م اور کې د ټولو لوبغاړو په سوځېدو سره یې ٢٣٢ منډې وکړې او د ١٧٠ منډو په توپیر یې هند ته لوبه وبلله.
په دغه لوبه کې رحمت شاه ٧٩، صدیق الله اتل ٤٢، رحمن الله ګربز ٤١ او ابراهیم ځدراڼ ٢١ منډې وکړې.
د یادونې وړ ده، هند په لومړۍ یو ورځنۍ لوبه کې هم افغانستان ته ماتې ورکړې وه.
