کابل (پژواک، ۲۳ چنګاښ ۱۴۰۵): د افغانستان د سوداګرۍ او پانګونې خونه وایي، افغان سوداګرو د روسیې د داغستان او تیومن او قزاقستان له سوداګرو سره د ۴۴۶ میلیونه او ۶۲۰ زره افغانیو په ارزښت هوکړهلیکونه لاسلیک کړي دي.
د یادې خونې د خبرپاڼې له مخې، دغه هوکړهلیکونه د دوشنبې په ورځ په کابل کې د افغانستان د سوداګرو او پانګوالو او د روسیې د داغستان او تیومن او قزاقستان د ګډ سوداګریز پلاوي ترمنځ د ناستې په ترڅ کې لاسلیک شول.
سرچینې لیکلي چې په دې ناسته کې د افغانستان د سوداګرۍ او پانګونې خونې مسوولانو، یو شمېر افغان سوداګرو او پانګوالو او د روسیې او قزاقستان د ګډ سوداګریز پلاوي غړو ګډون کړی و او د سوداګریزو فرصتونو، ظرفیتونو او د همکاریو د پراختیا په اړه یې خبرې وکړې.
د خبرپاڼې له مخې، لاسلیک شوي هوکړهلیکونه د ودانیزو توکو، درملو، خوراکي موادو او کرنیزو خدمتونو برخې رانغاړي.
د افغانستان د سوداګرۍ او پانګونې خونې د کورنیو تولیداتو او محصولاتو د ملاتړ مرستیال عبدالنافع بارکزي، دغه ډول ناستې د سوداګرۍ د پراختیا، د پانګونې د زیاتوالي او د اقتصادي فرصتونو د معرفي کولو لپاره اغېزناکې بللي او د اقتصادي ودې لپاره یې د دولتونو او خصوصي سکټور پر همکاریو ټینګار کړی.
په خبرپاڼه کې راغلي چې د روسیې د تیومن ایالت د سوداګرۍ خونې مرستیال الیسکویچ د افغانستان د سوداګرۍ خونې له مېلمهپالنې مننه کړې، د دغه سفر پایلې یې مثبتې ارزولې او له افغان سوداګرو یې غوښتي چې روسیې ته سفر وکړي.
ده ویلي چې دا همکارۍ به افغانستان ته د روسي توکو د صادراتو او روسیې ته د افغان محصولاتو د لېږد زیاتوالي ته زمینه برابره کړي.
