کابل (پژواک، ۲ زمری ۱۴۰۵):د راپورونو له مخې، د جرمني د اساسي قانون محکمې پرېکړه کړې چې د دغه هېواد حکومت نه شي کولای د افغان کډوالو د منلو ژمنې په ډلهییزه توګه لغوه کړي، بلکې د هرې دوسیې وضعیت باید په جلا توګه وڅېړل شي.
د راپور پر بنسټ، یادې محکمې نن جمعه اعلان کړی چې د افغان وګړو د منلو په تړاو د حکومت د ژمنو ډلهییز لغوه کول د جرمني له اساسي قانون سره په ټکر کې دي او چارواکي مکلف دي چې هره دوسیه په انفرادي ډول وارزوي.
دغه حکم د یوې افغانې مېرمنې او د هغې د دوو ماشومانو د شکایت په پایله کې صادر شوی دی. دغه کورنۍ په ۲۰۲۱ کال کې، د جرمني د پخواني حکومت د بشري منلو پروګرام له مخې او واک ته د اسلامي امارت له بیا رسېدو وروسته، جرمني ته د لېږد لپاره ټاکل شوې وه.
رویټرز لیکلي، محکمې ویلي چې د جرمني د کورنیو چارو وزارت د ۲۰۲۵ کال په ډسمبر کې د شاوخوا ۶۴۰ منلو ژمنو د لغوه کولو پرېکړه، پرته له دې چې د هر کس وضعیت جلا وڅېړل شي، د حکومت د خپلسرو اقداماتو د مخنیوي اصل نقض کړی دی.
د حکم له مخې، کله چې حکومت له یوه کس سره د منلو ژمنه وکړي، په دې پرېکړه کې هر ډول بدلون باید د هماغه کس د ځانګړو شرایطو په پام کې نیولو سره وشي.
په راپور کې راغلي چې د محکمې له حکم سره سم، د دې کورنۍ دوسیه باید د صلاحیت لرونکې اداري محکمې له خوا له سره وڅېړل شي. همدارنګه، د جرمني حکومت مکلف دی چې د ویزې تر صادرېدو یا د اساسي قانون مطابق تر بلې پرېکړې پورې، له دې کورنۍ سره چې اوس په پاکستان کې اوسېږي، خپل ملاتړ ته دوام ورکړي.
