کابل (پژواک، ۵ زمری ۱۴۰۵): د صنعت او سوداګرۍ وزارت وایي، د افغانستان او اوزبیکستان په سوداګریز فورم کې د دواړو هېوادونو د خصوصي سکټورونو ترمنځ د څه باندې ۲۰۰ میلیون ډالرو په ارزښت ۲۲ سوداګریز تفاهملیکونه لاسلیک شول.
د افغانستان د صنعت او سوداګرۍ وزارت نن (دوشنبه) په یوه خبرپاڼه کې ویلي، یاد فورم پرون د دواړو هېوادونو د خصوصي سکټورونو ترمنځ د اقتصادي اړیکو د پراختیا او د سوداګریزو راکړو ورکړو د زیاتوالي په موخه کابل کې جوړ شو.
د سرچینې د معلوماتو له مخې، په دې فورم کې د افغانستان د صنعت او سوداګرۍ وزیر نورالدین عزیزي، د ازبکستان د لومړي وزیر مرستیال جمشېد خواجهیف، یو شمېر وزیرانو او والیانو، د سوداګرۍ خونو مسوولانو او د دواړو هېوادونو د خصوصي سکټور استازو ګډون کړی و.
په خبرپاڼه کې راغلي چې د دغه سوداګریز فورم پر مهال د څه باندې ۲۰۰ میلیون ډالرو په ارزښت ۲۲ سوداګریز هوکړهلیکونه لاسلیک شول او دواړو لورو د اقتصادي همکاریو پر پراختیا او د دوهاړخیزې سوداګرۍ د کچې پر لوړولو ټینګار وکړ.
نورالدین عزیزي په دې غونډه کې ویلي، د شاوخوا ۳۰۰ خصوصي سوداګرو په ګډون د اوزبیکستان د لوړپوړي پلاوي سفر د دواړو هېوادونو ترمنځ د اړیکو د پراختیا ښکارندوی دی.
هغه هیله څرګنده کړې چې د دواړو هېوادونو ترمنځ د سوداګرۍ کچه پنځه میلیاردو ډالرو ته لوړه شي.
ده له افغان او اوزبیک پانګوالو غوښتي چې په افغانستان کې د پانکونې لپاره له شته فرصتونو ګټه واخلي.
هغه زیاته کړې، شاوخوا لس زره ټنه پنبه په ازمایښتي ډول له افغانستان څخه ازبکستان ته صادره شوې او دغه هېواد د نورو سل زره ټنه پنبې پېرلو ته هم چمتووالی ښودلی دی.
د ازبکستان د لومړي وزیر مرستیال جمشېد خواجهیف هم افغانستان مخ پر ودې هېواد بللی او ویلي یې دي چې د دواړو هېوادونو ترمنځ د سوداګرۍ د اسانتیا لپاره د نویو ترانزیټي لارو او لوژستیکي مرکزونو جوړول، د ترجیحي تعرفو وړاندې کول او د توکو د لېږد بهیر چټکول په کاري اجنډا کې شامل دي.
په دې غونډه کې د افغانستان د سوداګرۍ او پانګونې خونې د مدیره پلاوي رییس سیدکریم هاشمي او د ازبکستان د فرغانې والي هم د دواړو هېوادونو ترمنځ د اقتصادي او سوداګریزو همکاریو د پراختیا په اړه خبرې کړې دي.
