کابل (پژواک، ۲۳ وږی ۱۴۰۵): د افغانستان د المپیک، بدني روزنې او ورزش عمومي ریاست وایي، د هېواد د ووشو ملي فدارسیون اړوند اووه کسیزه لوبډله په شلم پړاو اسیایي المپیکي سیالیو کې د ګډون لپاره جاپان ته ولاړه.
د یاد ریاست د خبرپانې له مخې، په یاده اووه کسیزه لوبډله کې څلور ورزشکاران، دوه روزونکي او یو رئیس شامل دي.
سرچینه زیاتوي، د دغو ورزشکارانو د مخه ښې مراسمو کې د المپیک، بدني روزنې او ورزش عمومي ریاست رییس مولوي احمد الله وثیق، د آسیا په کچه په دغو مهمو سیالیو کې د افغان ورزشکارانو په ګډون خوښي وښوده او دا چاره یې د افغانستان د ورزش د ارزښت په لوړېدو کې مهم ګام وباله.
وثیق همداراز د ورزشکارانو د منظم قرنطین او ښه چمتووالي ته په کتو هیله څرګنده کړه چې افغان ورزشکاران به له دغو سیالیو څخه ښې لاسته راوړنې ولري.
د المپیک، بدني روزنې او ورزش عمومي ریاست د معلوماتو له مخې، ټاکل شوې چې د آسیا په شلم پړاو المپیکي سیالیو کې له افغانستان څخه په نهو بېلابېلو ورزشي رشتو کې ۳۴ ورزشکاران ګډون وکړي.
سرچینې لیکلي چې د آسیا شلم پړاو المپیکي سیالۍ به د روانې سپټمبر میاشتې له ۱۹مې څخه د اکتوبر تر څلورمې پورې د جاپان په ایچي-ناګویا ښار کې ترسره شي او په دغو سیالیو کې به د آسیا د ۴۵ هېوادونو ورزشکاران په ۴۱ ورزشي رشتو کې سیالۍ وکړي.
