کابل (پژواک، ۲۳ وږی ۱۴۰۵): د راپورونو له مخې، له لیبیا څخه د یونان کرِت ټاپو ته روانې د کډوالو یوې کښتۍ ته اوبه ورننوتې او د دغه ټاپو سوېل ته په سمندري اوبو کې له ستونزې سره مخ شوې ده؛ په دې پېښه کې لږ تر لږه یو کس مړ شوی، ۲۰ نور نادرکه دي او ۵۱ کسان ژغورل شوي دي.
اسوشیټېډ پرېس نن (دوشنبه) د یوناني چارواکو په حواله راپور ورکړی چې دغه کښتۍ له لیبیا څخه د کرِت پر لور روانه وه چې اوبه ورننوتې او د دغه ټاپو شاوخوا ۷۵ کیلومتره سوېل ته له ستونزې سره مخ شوه.
د راپور له مخې، د یونان ساحلي ساتونکو نن سهار وختي ۵۱ کسان د پېښې له ځایه ژغورلي، خو باور کېږي چې ۲۰ نور لا نادرکه دي او د هغوی د موندلو لپاره د لټون او ژغورنې عملیات روان دي.
په راپور کې د یوه کس د مړینې او د ۲۰ نورو د نادرکه کېدو د څرنګوالي په اړه نور جزئیات نه دي ورکړل شوي.
اسوشیټېډ پرېس لیکلي چې د ګزمې کښتۍ، یوه چورلکه، یوه بېپیلوټه الوتکه او یو شمېر سوداګریزې بېړۍ د لټون او ژغورنې په عملیاتو کې برخه لري او د اروپايي ټولنې د سرحدونو ساتنې اداره «فرونټکس» هم په دغو عملیاتو کې همکاري کوي.
د راپور له مخې، د مدیترانې سمندر له ختیځې لیبیا څخه د کرِت ټاپو پر لور مسیر په وروستیو کلونو کې اروپا ته د کډوالو د تګ له ډېرو کارېدونکو لارو څخه ګرځېدلی دی.
