کابل (پژواک، ۲۷ وږی ۱۴۰۵): د افغانستان بهرنیو چارو وزارت پر مکې مکرمې د برید هڅه غندلې او ویلي یې دي چې د دغو مقدسو اماکنو امنیت، حرمت او تقدس باید د هر ډول شخړې، تاوتریخوالي او پوځي اقداماتو له اغېزو خوندي وساتل شي.
د افغانستان د بهرنیو چارو وزارت خبرپاڼه کې راغلي چې مکې مکرمې ته څېرمه د ډرون برید هڅې په اړه خپرو شوو راپورونو د دغه وزارت ژوره اندېښنه راپارولې او د حرمینو شریفینو پر لور هر ډول اقدام چې د دغو سپېڅلو اماکنو امنیت او حرمت ته ګواښ پېښوي، یو نه بښونکی جنایت بولي او په کلکو ټکو یې غندي.
یاد وزارت لیکلي، حرمین شریفین د اسلامي امت ګډ سپېڅلي او د درناوي وړ مقدسات دي؛ د دغو مقدساتو امنیت، حرمت او تقدس باید د هر ډول شخړې، تاوتریخوالي او پوځي اقداماتو له اغېزو خوندي وساتل شي.
سرچینه زیاتوي، د حرمینو شریفینو پر لور هر ډول ګواښ، د مسلمانانو ژور احساسات راپاروي او د سیمې د لا زیاتې بېثباتۍ سبب ګرځي.
دا په داسې حال کې ده چې د سعودي عربستان په مشرۍ پوځي ایتلاف ویلي، د دغه هېواد هوايي دفاعي ځواکونو د سهشنبې په ماښام د مکې سوېل ته د حوثیانو یوه بېپیلوټه الوتکه د دغه ښار ممنوعه هوايي حریم ته له ننوتو مخکې نسکوره کړې ده.
د دغه ايتلاف ویاند ترکي المالکي ویلي، دا دویم ځل دی چې حوثیان د مکې د په نښه کولو هڅه کوي او زیاته کړې یې ده چې د حرمینو شریفینو او زایرینو امنیت د سعودي عربستان لپاره «سره کرښه» ده.
حوثیانو بیا د مکې مکرمې او نورو سپېڅلو ځایونو په نښه کول رد کړي دي.
