کابل (پژواک، ۷ تله ۱۴۰۵): د بېلاروس د عامې روغتیا وزیر د افغانستان د عامې روغتیا له وزیر سره په لیدنه کې ویلي، هېواد یې چمتو دی چې د درملو، طبي تجهیزاتو، د روغتیايي کارکوونکو د ظرفیت لوړونې او د مسلکي او علمي تجربو د تبادلې په برخو کې له افغانستان سره خپلې همکارۍ پراخې کړي.
د افغانستان د عامې روغتیا وزارت په خبرپاڼه کې راغلي چې د دغه وزارت وزیر مولوي نورجلال جلالي بېلاروس ته د خپل رسمي سفر په ترڅ کې د دغه هېواد د روغتیا له وزیر هودژایف الکساندر سره د روغتیايي همکاریو د پراختیا په موخه لیدنه وکړه.
سرچینه زیاتوي، په دې لیدنه کې افغانستان ته د درملو پر واردولو، طبي تجهیزاتو، د روغتیايي کارکوونکو د مسلکي ظرفیت پر لوړولو او د څېړنیزو معلوماتو پر تبادلې سربېره، پر بېلابېلو روغتیايي موضوعاتو خبرې وشوې.
جلالي ویلي، د افغانستان د عامې روغتیا وزارت هڅه کوي له بېلابېلو هېوادونو سره روغتیايي همکارۍ پراخې کړي او د مسلکي تجربو، طبي تجهیزاتو، درملو او روغتیايي خدمتونو په برخو کې له همکاریو څخه د هېواد د روغتیايي نظام د پیاوړتیا لپاره ګټه واخلي.
د خبرپاڼې له مخې، د بېلاروس د روغتیا وزیر هودژایف الکساندر هم د افغانستان له روغتیايي سکتور سره همکاریو ته په اشارې ویلي، هېواد یې چمتو دی چې د درملو، طبي تجهیزاتو، د روغتیايي کارکوونکو د ظرفیت لوړونې او د مسلکي او علمي تجربو د تبادلې په برخو کې له افغانستان سره خپلې همکارۍ پراخې کړي.
یاد وزارت لیکلي، د دغې لیدنې په پای کې د افغانستان او بېلاروس ترمنځ د روغتیايي همکاریو، د درملو او طبي تجهیزاتو، د روغتیايي کارکوونکو د ظرفیت لوړونې او د علمي او څېړنیزو معلوماتو د تبادلې په برخو کې د دوهاړخیزو همکاریو پر پراختیا هوکړه وشوه.
