کابل (پژواک، ۱۲ تله ۱۴۰۵): د زندانونو چارو د تنظیم اداره وایي، د نږدې ۴۷۹ زره امریکایي ډالرو په لګښت په شپږو زندانونو کې د ښځینه او نارینه بندیانو لپاره د کسبزدهکړې دوه کلنه روزنیزه پروژه پیل شوې ده.
د زندانونو چارو د تنظیم ادارې د معلوماتو له مخې، دغه پروژه د «او وای ډي او» موسسې له خوا د سویډن د همکارۍ بنسټ په ۴۷۸ زره او ۶۳۲ امریکایي ډالرو مالي ملاتړ او د دې ادارې په همغږۍ د «زندانونو د ملاتړ پروګرام» تر نوم لاندې عملي کېږي.
سرچینه وایي، د پروژې په لړ کې نن د کابل د څرخي پله مرکزي زندان د نارینه بندیانو لپاره د نجارۍ یو مجهز روزنیز مرکز پرانیستل شو.
د یادې موسسې د مسوولینو په وینا، د نجارۍ هره روزنیزه دوره به شپږ میاشتې دوام وکړي او په هره دوره کې به ۲۰ بندیانو ته د مسلکي روزونکو له خوا عملي او مسلکي زدهکړې ورکړل شي.
د زندانونو چارو د تنظیم ادارې مسوولین وایي، تر روزنې وروسته به یاد بندیان د خپلې بند مودې تر بشپړېدو پورې د زندان د نجارۍ په عملي مرکز کې په تولیدي چارو بوخت وي، څو عملي تجربه هم ترلاسه کړي.
سرچینه زیاتوي، ټاکل شوې په راتلونکو څو ورځو کې د کابل د ښځینه زندان د ښځینه بندیانو لپاره د خیاطۍ او د پکتیا، خوست، ننګرهار، هلمند او کندهار ولایتونو په زندانونو کې د ښځینه او نارینه بندیانو لپاره ورته مسلکي روزنیز مرکزونه هم پرانیستل شي.
د معلوماتو له مخې، دغه روزنیزه پروژه به دوه کاله دوام وکړي.
