کابل (پژواک، ۲ تله ۱۴۰۵): د اسلامي امارت د ټولګټو چارو وزارت وايي چې د افغانستان د اوسپنې پټلۍ ادارې عمومي رئیس د اقتصادي همکاریو سازمان (ایکو) په سیمهییزه غونډه کې د ګډون لپاره د یوه تخنیکي پلاوي په مشرۍ قزاقستان ته تللی.
د ټولګټو چارو وزارت ویاند محمداشرف حقشناس پر خپله اېکسپاڼه د یوې خبرپاڼې په خپرولو لیکلي چې د افغانستان د اوسپنې پټلۍ ادارې عمومي رئیس مولوي عبدالکریم فاتح به په یاده غونډه کې د هېواد د اوسپنې پټلۍ د اوسني وضعیت، روانو پروژو او راتلونکو پلانونو په اړه وینا وکړي.
هغه زیاته کړې چې فاتح به د دې غونډې په څنډه کې د ایکو سازمان د غړو هېوادونو له استازو سره د سیمهییز اتصال د پراختیا، سوداګرۍ، ټرانزیټ او اقتصادي همکاریو په اړه خبرې وکړي.
د ده په وینا، تمه کېږي چې په دې غونډه کې د افغانستان ګډون به د اوسپنې پټلۍ په برخه کې د ګډو همکاریو د پراختیا، پانګونې د راجلبولو او د سیمهییز اتصال د پیاوړتیا لپاره زمینه برابره کړي.
