په ميدان ښار کې ٤٠٠ کورنۍ د برېښنا له نعمت څخه برخمنې شوې

ميدان ښار (پژواک ٢٨ تله ٩٠): د ميدان وردګو ولايت د مرکز ميدان ښار اړوند د شهيد داوود خان مېنې ۴۰۰ کورنۍ د برېښنا له نعمت څخه برخمنې شوې.

د دې مېنې د ۴۰۰ کورنو لپاره د افغانستان برېښنا شرکت د ٥،٤ ميليونه افغانيو په لګښت برېښنا کوټ جوړ او ګټې اخيستنې ته وسپارل شو.

د داوود خان مېنې ياد شمېر کورنو ته د برېښنا پرانيستنې په مراسمو کې د ميدان وردګو والي محمد حليم فدايي په خپلو خبرو کې برېښنا د سيمې د اوسېدونکو لپاره ارزښتمنه وبلله او زياته يې کړه، چې دوه کاله مخکې يې ١،٦ ميګاواټه برېښنا له کابل څخه ميدان وردګو ولايت ته وغځوله او په دغه ولايت کې يې ۳ برېښنا کوټونه فعال کړل.

د هغه په وينا، دغه څلورم برېښنا کوټ دى، چې نن پرانيستل شو او له دغه ځاى څخه به په راتلونکې کې د ميدان ښار اړوند ابراهيم خېلو، اول خېلو، فولاد خان، ده افغانان او زمان خېلو کليو ته هم برېښنا ورکړل شي.

د افغانستان برېښنا شرکت مرستيال عبدالمالک وويل، دغه شرکت په پلان کې لري، چې د ميدان ښار پاتې سيمو ته هم برېښنا وغځوي.

له کابل څخه ميدان ښار ته د برېښنا شبکه په لومړي ځل د ١٣٨٨چنګاښ په ١٥مه وغځول شوه.

هماغه مهال د اوبو او انرژۍ سرپرست وزير اسماعيل خان ويلي وو، چې څلوېښت کاله مخکې د دغه ولايت د چک د برېښنا له بند څخه کابل ته برېښنا ورکړل شوې وه، خو کله چې د جګړو له امله هغه بند ويجاړ شو، نو اوس دوى د ازبکستان برېښنا له کابل څخه د دغه ولايت مرکز ته وغځوله.

د ميدان وردګو د ولايتي شورا رييس محمد حضرت جانان هم په دغو مراسمو د نوموړې مېنې پر اوسېدونکو غږ وکړ، چې د رغنيزو او ټولګټو پروژو په ساتنه کې دې خپل رښتينى مسووليت ادا کړي.

تر اوسه د دغه ولايت دولتي او نا دولتي ادارو او څه د پاسه ۱۵۰۰ کورنو ته برېښنا ورکړل شوې ده.