په لغمان کې سيلابونو لسګونه کورونه نړولي دي

 مهترلام (  پژواک د لړم لومړۍ نېټه٩٠ ) : دلغمان د الينګار  اواليشنګ  په ولسواليو کې  سيلابونو لسګونه کورونه نړولي ،  لسګونه څاروي  او سلګونه جريبه کرونده يې  له منځه وړې ده .

 دالينګار ولسوال  سيد شريف پاچا دلړم په لومړۍ نېټه پژواک خبري اژانس ته وويل چې نن سهار  د پرله پسې بارانونو له امله په دې ولسوالۍ کې درانه سيلابونه راغلل ، چې ددې ولسوالۍ دکنده راجايي په کلي کې يې   لسګونه کورونه نړولي ، لسګونه څاروي او په شاوخوا  اته سوه جريبه ځمکه کې  کرل شوې کرونده يې  له منځه وړې ده .

 هغه زياته کړه ، دې  سيلاب  چې درې ساعته يې دوام وکړ، دمهترلام _ الينګار د  عمومي سړک  يوه برخه  نړولې او   دا لار  يې څو ساعته  بنده کړې وه .

  همداراز، سيلابونو دهمدې ولايت  داليشنګ ولسوالۍ په شمکټ کلي  کې هم  لسګونه څاروي له منځه وړي دي .

 د لغمان ولايت  له طبعي پېښو  سره دمبارزې رييس  محمد نعيم  نظري د  پژواک ددې  پوښتنې په ځواب  کې چې په شمټک کې ولې کورونو او کروندو ته  زيا نه دى اوښتى ؟  وويل  چې د شمکټ کلى  په لوړه  پروت دى  او دلته کرونده او کورونه نشته دي .

 دوى ددې سيلابونو د  زيانونو  د څېړلو لپاره سيمو ته پلاوى  لېږلى او  له راستنېدو وروسته به له زيانمنو سره  مرسته وکړي .