محمودراقي (پژواک ٢٣ لړم ٩٠): د کاپيسا ولايت په تګاب ولسوالۍ کې د هاوان د مرمۍ د لګېدو له امله، يوه نجلۍ وژل شوې او دوه هلکان ټپيان شوي دي.
د تګاب ولسوال عبدالحکيم اخندزاده پژواک خبري اژانس ته وويل، چې دغه توغندى نن د لړم په ٢٣مه، د وسله والو طالبانو او امنيتي ځواکونو ترمنځ د نښتې پر مهال د جويبار په سيمه کې لګېدلى دى.
د نوموړي په وينا، د توغندى د لګېدو له امله يوه نجلۍ وژل شوې او دوه هلکان ټپيان شوي دي.
نوموړي زياتره کړه، تراوسه معلومه شوې نه ده، چې دغه توغندى د کومې ښکېلي غاړې له خوا توغول شوى دى.
اخندزاده د په دې اړه د څېړنو د پيل خبر ورکړ.
د سيمې يوه اوسېدونکي معلم عبدالستار پژواک ته وويل: ((نښته غرمه مهال پيل شوه او د ډزو غږ اورېدل کېده.))
د نوموړي په وينا، د نښتې پر مهال پر يوه کور د توغندي د لګېدو له امله، يوه ښځه وژل شوې او درې تنه نور د سيمې اوسېدونکي ټپيان شوي دي.
سرچينې د توغندي د توغولو د سيمه په اړه ناخبري وښودله.
د طالبانو وياند ذبيح الله مجاهد د نښتې د پخلي ترڅنګ پژواک ته وويل، چې د افغان او ايساف ځواکونو پر ګزمې د دوى په بريد کې، يو شمېر بهرني سرتېري وژل شوي دي.
خو نوموړي، بهرنيو سرتېرو او ملکي خلکو ته د مرګ ژوبلې په اړه کره معلومات ورنه کړل.
دا په داسې حال کې ده چې له دوو مياشتو راهيسې، په تګاب ولسوالۍ کې هېڅ ډول نښته نه ده شوې.
