جلال اباد (پژواک ٢٥ لړم ٩٠): نړيوالو ايتلافي ځواکونو د ننګرهار ولايت په خوګياڼو ولسوالۍ کې د يو لړ عملياتو په ترڅ کې ٤ تنه ونيول.
د خوګياڼو ولسوال حاجي محمد حسن د لړم په ٢٥مه پژوا ک خبري اژانس ته وويل، چې دغه عمليات تېره شپه د ولسوالۍ د ميملې د عودي خېلو په سيمه کې ترسره شوي دي.
نوموړي زياته کړه، ايتلافي ځواکونو خبر ورکړى، چې په دې سيمه کې يې ٤ تنه له وسلوالو مخالفينو سره د مرستې په تور نيولي دي.
ولسوال وويل، ده ته معلومات نشته، چې نيول شوي په چا پورې تړلي او په کومه سيمه کې نيول شوي دي.
د ننګرهار د والي وياند احمد ضياء عبدالزي پژواک ته وويل، چې ايتلافي ځواکونو څلور شکمن کسان له ځان سره بيولي دي.
په کابل کې د ايساف ځواکونو مطبوعاتي دفتر هم پژواک ته په خوګيانو ولسوالۍ کې د عملياتو پر مهال د څلورو تنو د نيول کېدو پخلى کړى دى.
د يادونې ده، چې د لړم په ١١مه د ايتلاف هوايي ځواک په دغې ولسوالۍ کې درې ماين خښوونکي وژلي وو.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن