کابل (پژواک ١٢ ليندۍ ٩٠): انګلستان له افغان پانګوالو سره په راتلونکو درې کلونو کې ٩ ميليونه امريکايي ډالره بې بدله مرسته کوي .
دغه پروژه د انګلستان نړيواله پراختيايي اداره (DFID) د افغانستان د پانګې اچونې د ملاتړ ادارې (ايسا ) سره په همغږۍ پلې کوي.
د ايسا ادارې مرستيال محمد نسيم اکبر نن په دې اړه جوړه شوې غونډه کې وويل چې مالي سرچينو ته د لاسرسۍ کموالي په افغانستان کې د خصوصي سکتور پر وړاندې له سترو ستونزو څخه دي .
هغه د انګلستان له خوا د دې بې بدلې مرستې په اړه خوښي وښوده او زياته يې کړه چې ددې پروګرام له لارې به ډېر پانګوال وکولى شي، چې خپلو پانګونو ته پراختيا ورکړي .
د انګلستان د نړيوالې پراختيايي ادارې د اړيکو مسوول همايون شهيم پژواک خبري اژانس ته وويل چې دغه مرستې به د بڼوالۍ ، مالدارۍ ، غالۍ اوبدلو ، فرنيچر ، دوا جوړونې او د کانونو په برخه کې له هغو پانګوالو سره وشي ، چې په پانګونو کې نوښت ولري.
دده په وينا، ياد شوي پانګوال بايد له اړونده ادارو سره ثبت وي ، د پانګونې لپاره ښه طرحه ، کاري وړتيا او په پروژو کې ډېرو کسانو ته کارموندنه هم په پام کې ولري.
شهيم وويل چې له پانګوالو څخه د طرحو د اخيستو لپاره په کال کې دوه ځله وخت ټاکل کيږي او اعلانيږي. دى وايي چې په شرايطو برابرو پانګوالو سره د هغوى دطرحو تر ارزونې وروسته مرسته کيږي.
د کندهار د سوداګرۍ او صنايعو خونې مرستيال او د مشکاني شرکت مشر حاجي فيض الحق مشکاني د انګلستان له خوا د بې بدله مرستې ياد پروګرام په پېل خوښي وښوده .
هغه وويل ، غواړي چې د کندهار ولايت پانګوال و هڅوي،ترڅو د پانګونې په برخه کې ښې طرحې جوړې او له دې مرستو څخه برخمن شي .
GET IN TOUCH
NEWSLETTER
SUGGEST A STORY
PAJHWOK MOBILE APP