د افغانستان، ترکمنستان، هند او پاکستان تر منځ د ګاز د پېر او پلور تړون لاسليکېږي

کابل (پژواک ٢٢ ليندۍ ٩٠): په نږدې راتلونکي کې به افغانستان، ترکمنستان، هند او پاکستان د ګاز د پېر او پلور تړون په عشق اباد کې لاسليک کړي.

په هغې خبرپاڼه کې، چې د ولسمشر د وياند له دفتر څخه پژواک خبري اژانس ته را رسېدلې، راغلي، چې په دې اړه هوکړه د افغانستان د ولسمشر حامد کرزي او د ترکمنستان د نفتو، ګازو او صنايعو د وزير بیرم گلیدی نادروف ترمنځ په ليدنه کې شوې ده.

د سرچينې د معلوماتو له مخې، په دې ليدنه کې، چې پرون په کابل کې ترسره شوه، نادورف وويل، چې د افغانستان د کانونو له وزيرسره به د خپلې نننۍ ناستې پاتې موضوعاتو ته، په عشق اباد کې د يوې ناستې په ترڅ کې وروستۍ بڼه ورکړي او څلور واړه هېوادونه به د ګازو د خرڅلاو او پېرودو تړون د ترکمنستان په پلازمينه عشق اباد کې لاسليک کړي.

په مقابل کې حامد کرزي د دې پروژې د اهميت په پام کې نيولو سره ويلي، چې د دې پروژې له پلې کېدو سره نه يوازې د څلورو واړو هېوادونو اقتصادي وده ګړندۍ کېږي، بلکې په سيمه کې به د امن او ثبات په ټينګښت کې هم مثبتې اغېزې ولري.

په دې ليدنه کې د افغانستان د کانونو وزير وحیدالله شهراني او د ترکمنستان د نفتو د انسټيټيوت، د نفتو او ګازو د زېرمو د پراختيا رييس قربان مرادوف هم حاضر وو.

دا په داسې حال کې ده، چې له تېرې نږدې يوې مياشتې راپه دېخوا، په افغانستان کې د اوبلن ګاز بيه له ٥٠ افغانيو نږدې سل افغانيو ته لوړه شوې ده.

د دې ستونزې د هوارۍ په موخه، د سوداګرۍ او صنايعو وزارت پرون اعلان وکړ، چې لس زره ټنه ګاز يې پېرلى او په ټيټ نرخ به يې کابل ښاريانو ته وړاندې کړي.