ګردېز (پژواک ٢٦ ليندۍ ٩٠): افغان او ناټو ځواکونو تېره شپه په ګردېز ښار کې د ګډو عملياتو پر مهال يوه ښځه وژلې، څلور تنه يې ټپي کړي او د پکتيا ولايت د نشه يي توکو پر وړاندې د مبارزې رييس يې له دوو زامنو سره نيولى دى.
د پکتيا د نشه يي توکو پر وړاندې د مبارزې د رييس ډاکتر حفيظ الله احمدزي د کورنۍ يوه غړي يوسف احمدزي د ليندۍ په ٢٦مه پژواک خبري اژانس ته وويل، چې دغه عمليات د شپې په دوه نيمو بجو ترسره شوي دي.
هغه زياته کړه، چې ايساف ځواکونو له کورنيو ځواکونو سره په ګډه د ډاکتر حفيظ الله پر کور عمليات ترسره کړل او هغه يې له دوو زامنو سره بوت.
د نوموړي په وينا، د دغو عملياتو پر مهال ډزې هم شوې، چې له امله يې پنځه مېرمنې ټپيانې شوې، چې وروسته يوې ټپي ښځې ساه ورکړه او يوه بله هم د کوما په حالت کې ده. ده.
يوسف احمدزي وويل، چې له ډاکتر حفيظ سره د هغه نيول شوي زامن يو يې زده کوونکى او بل يې په ګردېز ښار کې درملتون لري.
د پکتيا د امنيه قوماندانۍ د امنيت امر سمونوال سيد ذکريا پژواک اژانس ته وويل، چې ګډو ځواکونو د شکمنو کسانو پر ضد عمليات کړي، خو نور معلومات يې ورنه کړل.
خو د پکتيا مرستيال والي عبدالرحمن منګل پژواک ته ومنله، چې دغه عمليات د نشه يي توکو پر وړاندې د مبارزې د رييس ډاکتر حفيظ احمدزي پر کور ترسره شوي دي.
هغه زياته کړه، چې سيمې ته يې پلاوى لېږلى او د پلاوي له راپور وروسته به ټول معلومات د رسنيو په واک کې ورکړي.
په کابل کې د ايساف ځواکونو مطبوعاتي دفتر پژواک ته وويل، چې دوى تېره شپه په ګردېز ښار کې د يوه مخالف قوماندان پر ضد عمليات ترسره کړي دي.
سرچينې زياته کړه، چې دمګړۍ دوى په څېړنو بوخت دي او نور معلومات به وروسته خپاره کړي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن