کبير خان يو ځل بيا د کرکټ د ملي لوبډلې روزونکى وټاکل شو

کابل (پژواک ١٠ مرغومى ٩٠): کبير خان يو ځل بيا د افغانستان د کرکټ د ملي لوبډلې د روزونکي په توګه ټاکل شوى دى.

د افغانستان د کرکټ بورډ اجراييوي رييس نسيم الله دانش د مرغومي په ١٠مه پژواک خبري اژانس ته و ويل، چې له کبير خان سره يې د درېيو کلونو لپاره نوى تړون لاسليک کړى دى.

هغه زياته کړه، چې نوموړى به يوه مياشت وروسته افغانستان ته راشي او د هېواد د کرکټ ملي لوبډلې په روزنه به پيل وکړي‌.

نسيم الله دانش وايي، چې د کرکټ ملي لوبډله د کبير خان په څېر يوه پياوړي روزونکي ته ډېره اړتيا لرله او له نېکه مرغه دوى په دې بريالي شول، چې کبيرخان بېرته راولي.

نوموړي زياته کړه: ((له کبيرخان سره درې کلن تړون لاسليک شوی او د هغه په هڅه به يو ځل بيا ملي لوبډله د برياليتوبونو په لور نوي ګامونه پورته کړي.))

د هغه په وينا، کبيرخان نه يواځې دا چې يو پياوړی، تکړه او با تجربه روزنکی دى، بلکې د افغانستان له ژبې، کلتور او عنعناتو سره پوره بلدتيا لري.

پخوانى پاکستانى لوبغاړى کبيرخان په ٢٠٠٩ زېږديز کال کې د افغانستان د کرکټ د روزونکي په توګه ټاکل شوى و، چې له امله يې د هېواد د کرکټ ملي لوبډلې ډېرې برياوې لاسته راوړې وې.

خو تېر کال هغه له دې دندې استعفى ورکړه او د متحده عربي اماراتو د ملي لوبډلې د روزونکي په توګه وټاکل شو او د اماراتو لوبډلې ته يې هم يو شمېر برياوې ور په برخه کړې.

د کبيرخان له استعفى وروسته يو بل پاکستانى لوبغاړى راشد لطيف د افغانستان د کرکټ ملي لوبدلې د روزونکي په توګه وټاکل شو، خو له څو مياشتو وروسته هغه هم دغه دنده پرېښوده.

خو له تېرو څو مياشتو راهيسې د هېواد د کرکټ ملي لوبدله له نړيوال روزونکي بې برخې پاتې وه.

د کرکټ د چارو يو شمېر کارپوهان هم د کبير خان بيا ټاکنه نېک اقدام او د دې لوبې د پرمختګ لپاره ګټور بولي.

د کرکټ د ملي لوبډلې پخوانى کپتان رييس احمدزى وايي، چې د کرکټ بورډ د مسوولينو دغه اقدام د ډېرې ستاينې وړ دى.

هغه پژواک ته و ويل، چې کبيرخان د افغانستان له کولتور، دودونو او لوبغاړو سره ښه بلدتيا لري او دى کولاى شي، چې لوبغاړي ښه وروزي.

احمدزي زياته کړه، چې نورو بهرنيو روزونکو د افغانستان ولايتونو او ولسواليو ته سفرونه نه کول، خو کبيرخان کولاى شي ټولو سيمو ته سفرونه وکړي.

د لوبې مجلې مسوول مدير رحيم ګل څاروان وايي، چې د کبيرخان له راتګ سره به هغه تشه ډکه شي، چې له څو مياشتو راهيسې افغان ملي لوبډلې د روزونکي د نشتوالي له امله لرله.

د هغه په وينا، کبير خان يو پياوړى روزونکى دى، له افغان لوبغاړو سره ښه بلدتيا لري او کولاى شي، چې افغان ملي لوبډله په نړيوالو سياليو کې ښه وځلوي.

د لوبې د سپورتي روزنيزې موسسې مرستيال زراب شاه ظهير هم وايي، چې له روزونکي پرته لوبډله نيمګړې وي او د کبيرخان له راتګ سره دغه نيمګړتيا بشپړه شوه.

هغه وايي، چې روزونکي له لوبډلو سره له لوبې مخکې پلانونه جوړوي او کبيرخان يو ښه پلان جوړوونکى روزونکى دى.