اسلام اباد (پژواک ۲۳مرغومی ۹۰): د خيبر پښتونخوا په چارسدې ولسوالۍ کې چاودنې د دوو ماشومانو او دوو ښځوپه ګډون ٩ تنه ټپيان کړل .
دغه چاودنه د چارسدې بازار فاروق اعظم چوک سره نږدې تېره شپه شاوخوا ٨ بجې رامنځ ته شوه .
د چارسدې د ځايي پوليسو مشر روښان زيب پژواک ته وویل چې چاودنه د سي ډي دوکان مخې ته دځای پر ځای شويو چاودېدونکو توکو د چاودېدوله امله رامنځته شوې ده
دده په وينا، په چاودنه کې ٩ کسان ټپيان شوي ،چې دوه په کې ماشومان،دوه ښځې او پنځه نور نارينه دي .
د پېښې یوه عيني شاهد زاهدالله پژواک ته وويل چې ٧ ټپيان د چارسدې روغتون ته وړل شوي او دوه نور ټپيان، چې روغتیایي حالت يې د ډاډ وړ نه و، د پېښور ليډې ريډنګ روغتون ته لېږدول شوي دي .
د چارسدې روغتون يوه ډاکټر اياز خان پژواک اژانس ته وويل چې روغتون ته د راوړل شویو ٧ ټپيانو روغتیایي حالت د ډاډ وړ دی .
دا په داسې حال ده ، چې له قبايلي سيمو څخه سربېره وسلوالو دخيبر پښتونخوا ايالت په بېلابېلو سيمو صوابۍ ،مردان او چارسده کې هم وخت ناوخته د سي ډي دوکانونه او دولتي ودانۍ د خپلو بريدونو موخه ګرځولي دي .
قيصر يوسفزى
