د بادغيس د مرکز او ابکمري ولسوالۍ امنيتي مسووليت افغان ځواکونو ته وسپارل شو

قلعه نو (پژواک ١١ سلواغه ٩٠): د بادغيس د مرکز قلعه نو ښار او د دې ولايت د ابکمري ولسوالۍ د امنيتي مسووليتونو لېږد، نن د يو لړ مراسمو په ترڅ کې له بهرنيو ځواکونو څخه افغان ځواکونو ته وسپارل شو.

 په دې مراسمو کې چې د بادغيس په مرکز کې پر لاره اچول شوي وو، د امنيتي مسووليتونو د لېږد کمېسيون مشر ډاکټر اشرف غني احمدزي، د دفاع او کورنيو چارو وزارتونو مرستيالانو، د ظفر ٢٠٧ قول اردو قوماندان، د بادغيس والي دلبر جان ارمان او د دې ولايت يو شمېر مخورو هم ګډون کړى وو.

 په دې مراسمو کې د بادغيس والي وويل، چې تر دې مخکې په مرکز کې بهرني ځواکونو شتون درلود؛ خو په ابکمري ولسوالۍ کې يې هېڅ فزيکي شتون نه درلود او د دې دوو سيمو امنيت پوليسو ساته.

 ارمان زياته کړه، چې پوليس د سيمې د اوسېدونکو په مرسته چمتو دي، څو د بهرنيو ځواکونو له شتون پرته امنيت وساتي.

 د بادغيس والي وزګارتيا، روغتيايي او پوهنيزو خدمتونو ته نه لاسرسى، د مرکز او ولسواليو تر منځ د ارتباطي لارو نه شتون او د چارواکو له خبرتيا پرته له مرکز څخه د کارکوونکو ګومارل، په دې ولايت کې شته ستونزې وښودلې.

 د بادغيس امنيه قوماندان سمونوال محمد جبار صالح له پژواک سره په مرکه کې وويل، چې دا بهير به د خلکو په همکارۍ لا بريالى شي.

 د هغه په وينا، هغوى د امنيت د ساتنې توان لري؛ خو ډېرو اکمالاتو او تجهيزاتو ته اړتيا لري.

 د امنيتي مسووليتونو د لېږد د کمېسيون مسوول اشرف غني احمدزي، د بادغيس د امنيتي ځواکونو د کړنو د ستاينې ترڅنګ وويل، چې دا پروسه به د نورو ولايتونو په څېر په بادغيس کې هم په بريالۍ توګه پرمخ ولاړه شي.

 نوموړي له خلکو څخه وغوښتل، څو له امنيتي ځواکونو سره د خپلو سيمو د امنيت په ساتنه کې مرسته وکړي.

 احمدزي د امنيتي مسووليتونو له لېږد څخه وروسته، د امنيتي ځواکونو د اکمالاتو په اړه څرګنده کړه، چې دا کار به په نږدې راتلونکي کې د اړوندو وزارتونو له لوري ترسره شي.

 د بادغيس د امنيتي مسووليتونو د لېږد مراسم د اشرف غني احمدزى له لوري د ولسوالۍ او زون مسوولينو ته د افغانستان د بيرغ په سپارلو سره پاى ته ورسېدل.

 د امنيتي مسووليتونو د لېږد دويم پړاو د ليندۍ په لسمه، د سياه ګرد او شينواريو له ولسواليو پرته په پروان ولايت کې پيل او وروسته بيا په ډايکندي، پروان، سمنګان ولايتونو او د هلمند، بلخ، نيمروز ولايتونو په ځينو ولسواليو او د ننګرهار، چغچران، شبرغان، فيض اباد، غزني او ميدان ښار په ښارونو کې ترسره شو.

 د يادونې وړ ده، چې د امنيتي مسووليتونو د لېږد لومړى پړاو د روان کال د چنګاښ په ٢٦مه، د باميانو له ولايت څخه پيل او په پنجشېر ولايت او له سروبي ولسوالۍ پرته په کابل او مهترلام، لښکرګاه، هرات او مزارشريف ښارونو کې ترسره شو.