په بټي کوټ کې د امنيت د خرابوالي لامل په ادارو کې نه همغږۍ په ګوته شوه

جلال اباد (پژواک ۱۸ سلواغه ۹۰) : د ننګرهار د بټي کوټ ولسوال وايي چې په دولتي ادارو کې نه همغږۍ ددې ولسوالۍ امنيت خراب کړى دى.

بټي کوټ ، چې د جلال اباد – تورخم پر لويه لاره پرته ده، له تېر يوه کال راهيسې  پکې امنيتي  پېښې زياتې شوې دي.

د بټي کوټ  نوي ولسوال  حاجي زلمي  د سلواغې په ۱۸ مه له پژواک خبري اژانس سره په يوې ځانګړې مرکې کې وويل چې په دې ولسوالۍ کې د رغنيزو پروژو او امنيت نشتوالی ددغې ولسوالۍ په ادارو کې د نه همغږۍ له امله رامنځ ته شوى دى.

هغه زياته کړه چې  موسسې په ډاډه زړه نه شي کولی ،چې په دغې ولسوالۍ کې پروژې پلې کړي او نه هم  د تورخم – جلال اباد مسافرين په ډاډه زړه له دغې  ولسوالۍ تېرېدلى شي.

  ولسوال وويل چې  پوليسو د ابتداييه محکمې په ودانۍ کې  بسترې اچولي او په وينا يې ډېرې داسې بې نظمه ادارې شته ، چې د ولس له  همغږۍ پرته چارې تر سره کوي.

 د حاجي زلمي په وينا، په لومړي سر کې به دولتي ادارې منظمې او بيا به دخلکو په مرسته ډاډ من امنيت رامنځته کړي.

 ولسوال وويل چې د جهاد د دورې له پېژندګلوۍ څخه  په ګټه اخيستو به د قومي مشرانو    اعتماد تر لاسه کړي،د پوهنې ، روغتيا او سړکونو پروژې به په دغې نسبتاً نا ارامې ولسوالۍ کې پلې کړي.

 نوموړى وايي چې په خپلو شخصي امکاناتو به د ولسوالۍ په مرکز کې د کمپيوټر زده کړې يو ستر روزنيز مرکز پرانيزي.

 ددغې ولسوالۍ د پرمختيايي شوار منشي حاجي شريف خان پژواک ته وويل چې ددغې ولسوالۍ نږدې ټول ښوونځي د انګړ دېوالونه ،نه لري او نه هم يو داسې لومړنی لس بستريز روغتون لري، چې ناروغان يې درملنه کړي .

 شريف خان وايي چې د سپين غر او کوټ له ولسواليو څخه په عمبر خانې خوړ کې  سيلابونه  هر وخت د دوی لسګونه جريبه ځمکه وړي او د پول د نشتوالي له امله ولسوالۍ په دوو برخو وېشي .

 نوموړي قومي مشر زياته کړه چې په بټي کوټ کې د دولتي ځنګلونو او فارمونو شتون تر څنګ ، د نورو ولاياتو د اوسېدونکو استوګنه د ناارامۍ يوبل  ستر لامل دی.

 د عمبر خانې د کلي قومي مشر نور رحمان مومند پژواک اژانس ته وويل چې د نوي ولسوال له راتګ وروسته دوی ټولو موسساتو ته تضمين ورکوي، چې د انجنيرانو او کارکوونکو امنيت به يې خوندي کوي.

 دغه قومي مشر د ولسوالۍ د ستراتيژيک موقعيت له امله غوښتنه وکړه چې د ملي پوليسو تشکېل دې   زيات  شي.