کابل (پژواک ٩ کب ٩٠): د اولمپيک ملي کمېټه د لوبغاړو ترمنځ د لا زيات يووالي په موخه په کابل کې د اولمپيک سراسري سيالۍ په لاره اچوي.
د اولمپيک د ملي کمېټې مشر محمد ظاهر اغبر پژواک خبري اژانس ته وويل چې دوى په پام کې لري، ترڅو د راتلونکي کال په دوبي کې د “المپيک کابل” تر نوم لاندې سراسري سيالۍ په لاره واچوي.
نوموړي زياته کړه، چې د کابل د اولمپيک په سياليو کې د هېواد له لوبغاړو سربيره، په بهر کې کډوال لوبغاړي به هم راوبلل شي.
د اغبر په وينا، دغه سيالۍ به د ښاروالۍ او امنيتي ارګانونو په مرسته د کابل په بېلابېلو ورزشي لوبغالو کې ترسره شي.
د اولمپيک د ملي کمېټې مشر زياته کړه، چې د دغو سياليو لګښت به د اولمپيک د ملي کمېټې له خوا د سوداګرو او له هېواد نه بهر د خپلواکو ورزشي ټولنو په مرسته تامين شي.
د نوموړي په وينا، ټاکل شوې د افغان سوک وهونکي حميد رحيمي سيالي له يوه امريکايي سيال سره يې په کابل کې ترسره شي.
رحيمي څو ورځې مخکې خپل بيلاروسي سيال ته ماتې ورکړه او د سوک وهنې د نړيوالې اتحاديې (WBU)د سياليو اتلولي يې ترلاسه کړه.
اغبر وويل: ((موږ چمتو يو، ترڅو د رحيمي او د هغه امريکايي سيال، سيالي په افغانستان کې ترسره کړو.))
د اولمپيک د ملي کمېټې رييس که څه هم چې د رحيمي د امريکايي سيال نوم وانخيست؛ خو ويې ويل، چې دغه امريکايي سوک وهونکى به ډېر ژر افغانستان ته راشي او د دې سيالۍ زمينه به هم برابره شي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن