لښکرګاه ( پژواک ٣ ورى ٩١ ) : د هلمند امنيه قوماندان وايي ، چې د لښكرګاه ښار په ګډون په لسو ولسواليوكې يې ۱۶ زره او اوه سوه جريبه ځمكه له كوكنارو څخه پاكه کړې ده.
د هلمند امنيه قوماندان سمونوال عبدالنبي الهام د وري په ٣مه، په لښکرګاه کې يوې خبري غونـډې ته د وينا پرمهال د کوکنارو د اړولو د کمپاين په اړه معلومات ورکړل.
هغه زياته کړه چې د كوكنارو دله منځه وړلو كمپاين په لسو ولسواليوكې په چټكۍ سره پرمخ روان دى او تردې مهاله ۱۶زره او اوسوه جريبه كرل شوي كوكنارو د روان كمپاين پرمهال له منځه وړل شوي دي.
دده په وينا ، سږكال د كوكنارو د كمپاين ستراتيژي داسې جوړه شوى، چې پوره دوه مياشتې به كاركوي او لومړى به د هغو كسانو ترياك له منځه وړل كېږي ، چې يا خو قاچاقبر وي او يايې هم خلكوته د كوكنارو دكرلو امر کړى وي او يا يې د ساتلو ژمنه ور كړې وي.
الهام وايي ، چې عملاٌ د كوكنارو له منځه وړلودكمپاين تر څنګ تبليغاتي پروګرام هم په لاره اچول شوى، تر څو كرونده ګر خپله هم كرل شوي كوكنار له منځه يوسي.
د امنيه قوماندان په خبره؛ د روان كمپاين پرمهال نږدې ټول پوليس مرسته كوي او تر دې مهاله يواځې د ماين په چاودونوكې دوه پوليس وژل شوي او شپږ تنه ټپيان شوي دي.
الهام زياتوي ، چې دغه كمپاين د۱۱۹ تراكتورونو په وسيله پرمخ وړل كيږي.
د هلمند چارواكي وايي، چې سږكال ددې ولايت په شاوخوا ۵۰ زر هكتاره ځمكه کې كوكنار كرل شوي .
