په نوښار کې ترافيکي پېښې يو تن مړ او٤٠ ژوبل کړل

اسلام اباد (پژواک ١٢ ورى ٩١): د پاکستان د خيبر پښتونخوا په نوښار سيمه کې د ترافيکي پېښې له امله يو تن مړ  او٤٠ نور ژوبل شول.

د پاکستان د خيبر پښتونخوا ايالت په نوښار ضلع کې د سيمې يوه پوليس افسر جهانزېب د وري په ١٢مه، پژواک خبري اژانس ته وويل چې دغه پېښه نن مازيګر شاوخوا درې بجې د نوښار اړوند په ډاګ بهسود سيمه کې رامنځ ته شوه.

د هغه په وينا، د واده يوه لارۍ موټر چې له خلکو ډک وو، له يو بل موټر سره ټکر وکړ او له امله يې يو تن مړ شو او د ښځو او ماشومانو په ګډون ٤٠ تنه په کې ټپيان شول.

د هغه په وينا، پېښه د دواړو موټر د ګړندي تګ او بې احتياطۍ له امله رامنځ ته شوې ده، ټپيان يې دا مهال د پېښور ليډي رېډنګ روغتون ته لېږدول شوي دي.

په سيمه کې يوه دوکاندار رييس خان پژواک اژانس ته وويل، چې په سيمه کې د عاقب په نوم د يو تن واده  واو د ورا موټر يې د خسر د کور پر لور روان وو، چې پر لاره يې له هغې اخوا له راتلونکي موټر سره ټکر وکړ.

د هغه په وينا، د پېښې له ٤٠ تنو ټپيانو څخه يې ١٢ د پېښور ملکي روغتون ته وړي او نور يې له سيمې سره نږدې د پبو سيمې روغتون ته لېږدولي دي.

ده زياته کړه، چې ټپيان يې ټول له نږدې ليدلي دي او د شپږو ماشومانو روغتيايي حالت يې د اندېښنې وړ وښود.