کابل ښار (پژواک، د زمري لومړۍ نېټه ٩١): د بهرنیو چارو وزارت سیاسی مرستیال په کابل کې د پاکستان سفير ته پر کونړ د پاکستان له خاورې د بريدونو په اړه د اندېښنې د څرګندولو ترڅنګ دواړو لوريوهوکړه وکړه، چې په نږدې راتلونکې کې به په جلال اباد کې د دواړو هېوادونو د پوځيانو ترمنځ غونډه جوړوي.
د بهرنيو چارو وزارت له مطبوعاتي دفتر څخه د زمري په لومړۍ نېټه پژواک اژانس ته په رالېږل شوې خبرپاڼه کې راغلي، چې د بهرنيو چارو وزارت سياسي مرستيال جاوید لودین نن د خپل کار په دفتر کی د کنړ پر څو کليو د ډیورنډ له کرښی هاخوا څخه د توغندويي بریدونو په اړه په کابل کې د پاکستان له سفیر محمد صادق سره وکتل او د افغان د حکومت جدي اندېښنه یې په دې اړه ورته څرګنده کړه.
خبرپاڼه کاږي، دواړو خواوو هوکړه وکړه، چې په نږدې راتلونکي کې به د جلال اباد په ښار کې د دواړو هېوادونو د لوړپوړو پوځي چارواکو یوه ګډه غونډه جوړه کړي، ترڅو وروستي بریدونه وڅېړي.
د سرچينې په وينا، دغه راز به د جلال اباد په غونډه کې د ډیورنډ د کرښې په اوږدو کې د دواړو هېوادونو د پوځونو ترمنځ همغږي زیاته کړي او داسې لارې چارې به ولټوي، چې پر افغان کليو باندې د هر راز راتلونکو بریدونو مخه په پوره توګه ونیسي.
د خبرپاڼې په وينا، لودین زیاته کړه، چې د افغان کليو پر وړاندې د هر راز داسې بریدونو دوام کولای شي د دواړو هېوادونو ترمنځ په دوه اړخیزه اړیکو جدي منفي اغېز وکړي.
د ده په خبره، په ځانګړې ډول په داسې حال کې ، چې دواړه هېوادونه باید یو د بل ترمنځ د سولې، امنیت او اقتصادي همکاریو پورې اړوند د مهمو همکاریو په لړۍ کې له یو بل سره نږدې کار وکړي.
د توغنديو په وروستي برید کې، چې د چنګاښ د ۲۹ مه شپه رامنځ ته شو، درې نارینه او یوه ښځه وژل شوي او شپږ نور ملکي وګړي ټپیان شول.
له تېر کال راهيسې د پاکستان له خاورې د افغانستان پر کونړ او ځينو نورو سرحدي ولايتونو په وقفه يي ډول راکټي بريدونه کيږي، چې لسګونو کسانو ته يې مرګ ژوبله اړولې ده .
تېره پنجشنبه ولسمشر حامد کرزي په کابل کې د پاکستان له لومړي وزير راجه پروېز اشرف سره په دې اړه خبرې وکړې.
خو د کونړ د چارواکيو په وينا، تېره ورځ يو ځل بيا د پاکستاني پوځ لخوا پر دې ولايت ٣٠٠ توغندي ويشتل شوي، چې د يوې ښځې په ګډون يې څلور ملکي کسان وژلي او ٦ نور يې ټپيان کړي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن