چاريکار( پژواک، ١٥ زمرى ٩١): د پروان ولايت په جبل السراج ولسوالۍ کې د ملي امنيت دوه کارکوونکي وژل شوي او دوه نور ټپيان دي .
د جبل السراج امنيه قوماندان سمونوال محمد معصوم فرزه يي پژواک خبري اژانس ته وويل ، چې تېره شپه اتو تنو وسلوالو طالبانو ددې ولسوالۍ د ګذر پايين په سيمه کې د نبي حواله دار په کور کې ناسته لرله .
دى وايي، د ملي امنيت موظفينو غوښتل ،چې ياد شوي طالبان ژوندي ونيسي، خو نښته رامنځته او له امله يې ياده مرګ ژوبله واوښته .
د هغه په وينا، يادو شويو طالبانو او په حواله دار مشهور نبي، چې خټګر دى تښتېدلي ، خو د نبي ورور او د تره زوى د ملي امنيت موظفينو نيولي دي .
د سرچينې د څرګندونو له مخې، د نبي په کور کې له تويې شويو وينو څرګنديږي ، چې په ياده نښته کې يو تن طالب يا وژل شوى او يا هم ټپي شوى دى .
ده وويل ،چې د ملي امنيت ځواکونو له دې کور څخه يو له اوږې څخه ويشتونکى راکټ هم تر لاسه کړى دى .
خو د طالبانو وياند ذبيح الله مجاهد وايي، چې په دې نښته کې د ملي امنيت درې تنه وژل شوي او يو ټپي دى.
پژواک هڅه وکړه ، چې په دې اړه د ملي امنيت رياست له چارواکيو سره خبرې وکړي ، خو اړيکه ورسره ټينګه نه شوه .
