لښكرګاه (پژواک،٢٩ زمرى ۹۱ ): دهلمند ولايت د ګرشک ولسوالۍ د زندان امر د يوې چاودني په ترڅ كې ووژل شو.
د ګرشک امنيه قوماندان سمونيار ګلي خان پژواک خبري اژانس ته وويل، چې ددې ولسوالۍ د زندان امر محمد اسماعيل خان تېره ورځ هغه مهال ووژل شو، چې په شخصي كرولا موټركې يې چاودېدونكي توكي وچاودېدل.
همدارنګه د زندان دامنيت مدير سمونوال راز محمد په دې اړه وايي، چې دزندان د امر په موټر كې چاودېدونكي توكي له زندان څخه دباندې ځاى پرځاى شوي و .
دده په خبره ، كله چې نوموړى له زندان څخه خپل موټر ته ورسيد، په همدې وخت كې چاودنه پرې وشوه او ځاى پرځاى ووژل شو.
د راز محمد په وينا، په دې پيښه كې بل چا ته زيان نه دى اوښتى، خو پوليسو يې په اړه پلټني پيل كړي ، ترڅو معلومه كړي ،چې په دغه موټركې چاودېدونكي توكي څنګه ځاى پرځاى شوي و.
سيمه ييز چارواکي ، وسلوال طالبان ددې پيښې مسوول ګڼي، خو دوى تراوسه په دې اړه څه نه دي ويلي.
ديادونې ده، چې تيره اوونۍ هم دګرشک ولسوالۍ د برېښنامدير د ولسوالۍ په بازاركې د وسلوالوكسانو لخوا په ډزو وژل شوى و.
