جلال اباد (پژواک، ٥ وږى ٩١): د ننګرهار پوهنتون د روغتون سرطبيب وايي، که د ماشومانو نړيوال صندوق د روغتيايي شيدو مرستې بيا پيل نه کړي، د ختيځو ولايتونو خوار ځواکي ماشومان به د مرګ له ګواښ سره مخ شي.
د دغه روغتون سرطبيب ډاکټر ناصر کامه وال د وږي په ٥مه پژواک خبري اژانس ته وويل، چې روغتون يې په هرو شلو ورځو کې پنځلس خوار ځواکي ماشومان بستروي چې د عامې روغتيا رياست له لارې دغو ماشومانو ته د اېف ٧٥ په نوم روغتيايي شيدې د ماشومانو نړيوال صندوق ( unicef) ورکوي.
هغه زياته کړه، چې له څه مودې راهيسې د عامې روغتيا او يونيسف په زېرمتونونو کې دغه شيدې خلاصې شوې دي.
نوموړى وايي: ((د شيدو د خلاصېدو له امله ماشومان د مرګ له ګواښ سره مخ دي.))
ډاکټر ناصر کامه وال وويل، چې د خوار ځواکي ناروغي د هغو خلکو په ماشومانو کې پيداکېږي، چې اقتصادي وضعه يې ټيټه، مېرمنو او ماشومانو ته پوره او سم خواړه نه شي برابرولى.
د کامه وال په اند، د خلکو ناپوهي او د ماشوم په وجود کې د مېکروب شتون دغې ناروغۍ ته د فعاليت ښه زمينه برابروي.
د ننګرهار د عامې روغتيا رياست د تغذيې د څانګې مشر ډاکټر شېراغا ساپي پژواک اژانس ته وويل، چې د دغه ولايت له مرکز سربېره په کامې، غني خېلو او خوګياڼو ولسواليو کې د خوار ځواکو ماشومانو لپاره پنځلس بستريزې څانګې لري، چې په منځنۍ کچه ورته د مياشتې سل تنه د بستر لپاره ور وړل کېږي.
ډاکټر ساپي وويل، چې د اېف ٧٥ په نوم شيدې يواځې په پوهنتون روغتون کې ختمې شوي او په پاتې نورو مرکزونو کې لا شته.
نوموړى زياتوي، چې د اېف ٧٥ شيدو پر ځاى د اړتيا پر مهال دوى اېف ١٠٠ شيدې خوار ځواکو ماشومانو ته ورکوي، چې د ډېرو اوبو په ګډولو سره د اېف ٧٥ ځاى نيسي.
ډاکټر شېراغا د روغتيايي شيدو نشتوالى په کراچۍ بندر کې د ماشومانو د نړيوال صندوق د مالونو ځنډ وباله.
د هغه په وينا، د پوهنتون د روغتون لويه ستونزه دا ده، چې د کافي پرسونل نشتوالي له امله نه شي کولى د خوار ځواکو ماشومانو ښه درملنه وکړي.
د سره رود ولسوالۍ يوې اوسېدونکې نجيبې پژواک ته وويل، چې د خپل ماشوم لپاره د شيدو ترلاسه کولو په موخه پوهنتون روغتون ته راغلې وه، چې د شيدو د نشتوالي له امله خالي لاس کور ته ځي.
نوموړې زياته کړه، لويه ستونزه دا ده، چې دغه روغتيايي شيدې په ښارونو کې نه پيدا کېږي.
GET IN TOUCH
NEWSLETTER
SUGGEST A STORY
PAJHWOK MOBILE APP