په حصارک کې د پاڅون کوونکو او طالبانو ترمنځ نښته شوې

جلال اباد (پژواک ٨ وږى ٩١): په ننګرهار ولايت کې د پاڅون کوونکو او وسلوالو طالبانو ترمنځ نښته کې دواړو لورو ته مرګ ژبله اوښتې ده.

د حصارک ولسوال حاجي عبدالخالق معروف د وږي په ٨مه پژواک خبري اژانس ته وويل، چې دا نښته نن غرمه شوې او درې ساعته يې دوام درلود.

هغه زياته کړه، چې وسلوالو طالبانو د دې ولسوالۍ د محمدکلا په سيمه کې پر هغو خلکو بريد وکړ، چې د دوى پر ضد يې پاڅون کړى دى.

د نوموړي په وينا، پوليس هم د پاڅون کوونکو مرستې ته ورغلل او په رامنځته شوې نښته کې دواړو لورو ته مرګ ژوبله واوښته.

ولسوال وايي، چې په  دې نښته کې يو پاڅون کوونکى ټپي، يو طالب وژل شوى او دوه يې په ټپي حال کې له وسلو سره نيول شوي دي.

معروف زياتوي، چې وسلوال مخالفين له سيمې تښتېدلي دي.

د يادونې ده، چې څو ورځې مخکې د دې ولسوالۍ د څو کليو خلکو د وسلوالو طالبانو پر ضد پاڅون وکړ او خپلې سيمې يې له طالبانو پاکې کړې.