چاریکار( پژواک ١١ وږى ٩١): د پروان ولايت د شينوارو ولسوالۍ امنيه قوماندان په يوه وسلوال بريد کې ټپي شو، خو ولسوال يې له بريده روغ ووت.
د شينوارو ولسوال صاحبزاده ګل طارق پژواک خبري اژانس ته وويل، چې دى ، ددې ولسوالۍ امنيه قوماندان عبدالمالک او يو شمېر پوليس په دوو رېنجر موټرو کې د پروان مرکز چاريکار ته پر لاره و، چې د مخالفينو له کمين سره مخ شول.
هغه وويل ، چې په دې بريد کې يواځې عبدالمالک ټپي شو او بريدکوونکي له پوليسو سره تر لنډې نښتې وروسته وتښتېدل.
د ده په وينا، عبدالمالک د درملنې لپاره د پروان ملکي روغتون ته لېږدول شوى دى.
د پروان روغتون يو ډاکټر ولي قادري وايي، چې عبدالمالک بډوډي ته نږدې د کلاشينکوف يوه مرمۍ خوړلې ، خو روغتيايي حالت يې د ډاډ وړ دى .
د دولت وسلوالو مخالفينو تر اوسه د ياد بريد په اړه څه نه دي ويلي.
شاوخوا يوه مياشت مخکې کبيراحمد رحيل ، چې هغه مهال د شينوارو ولسوال و، هم ددې ولسوالۍ په درازګرد سيمه کې له يو وسلوال بريد څخه روغ وتلى و.
