کندهار ښار (پژواک ٢٥ وږى ٩١): په کندهار ښار کې د يوې چاودنې له امله يو پوليس وژل شوى او دوه نور ټپيان دي.
د کندهار ولايت د مطبوعاتي دفتر مسوول جاوېد فيصل د وږي په ٢٥مه پژواک خبري اژانس ته وويل، چې دا چاودنه نن له غرمې وروسته شاوخوا يوه نيمه بجه د ښار د ميرويس مېنې د چارباغ په سيمه کې د پوليسو پر يوه رينجر موټر رامنځته شوې ده.
د فيصل په وينا، په دې چاودنه کې يو پوليس وژل شوى او دوه ټپيان دي.
د ميرويس روغتون يوې سرچينې پژواک ته وويل، چې دوى ته له يادې پېښې يو مړى او دوه ټپيان ور وړل شوي دي.
سرچينې د ټپيانو روغتيايي حالت د ډاډ وړ وباله.
د عبدالقدوس په نوم د پېښې يوه عيني شاهد پژواک ته وويل، چې پوليس پر ګزمه بوخت وو، چې د ماين چاودنه پرې وشوه.
د هغه په وينا، په چاودنه کې د پوليسو رينجر ويجاړ شوى دى.
وسلوالو طالبانو تر اوسه په دې اړه څه نه دي ويلي.
