اسعداباد (پژواک ٩تله ٩١): د کونړ چارواکي وايي چې وسلوالو طالبانو په دې ولايت کې درې ملکي وګړي د له خوا وژل شوي دي.
د کونړ د والي وياند واصف الله واصفي د تلې په ٩مه، پژواک خبري اژانس ته وويل چې څو ورځې مخکې، وسلوالو طالبانو درې ملکي وګړي د وټه پور ولسوالۍ له مربوطاتو څخه تښتولي وو.
نوموړي زياته کړه چې وسلوالو طالبانو، دغه کسان دولت سره د همکارۍ په تور برمته کړي وو.
واصفي وايي، تښتول شوي کسان پرون شپه د وسلوالو طالبانو له لوري وژل شوي دي.
د ده په خبره، وژل شوي کسان بې ګناه او له دولت سره يې هېڅ تړاو نه درلود.
يو تن د نوم نه ښودلو په شرط پژواک اژانس ته وويل، دغه کسان د وټه پور ولسوالۍ اړوند د کټار ګمبير اوسېدونکي وو.
د يادې پېښې په اړه تراوسه وسلوالو طالبانو څه نه دي ويلي.
