افغانستان دډیورنډ کرښې په اړه د ګروسمان څرګندونې رد کړې

کابل ( پژواک د لړم لومړۍ ۹۱ ) : د بهرنیو چارو وزار ت د ډیورنډ کرښې په اړه  دامریکا د ځانګړي استازي وروستۍ څرګندونې رد کړې.

افغانستان  او پاکستان لپاره دامریکا ځانګړظ استازی مارک ګروسمان چې پرون له اسلام اباد څخه کابل ته رسیدلی دی، له یک خصوصي  تلویزیون سره په یوه ځانګړې مرکه کې ویلي چې هیواد یې دډیورنډ لاین کرښه د افغانستان او پاکستان ترمنځ د رسمي پولې په اړه پيژني.

ددغې مرکې له خپریدو سره سم د افغانستان د بهرنیو چارو وزارت لخوا په یوه مختصره خبرپاڼه کې د ګروسمان څرګندونې رد شوي دي.

ددې خبرپاڼې چې یوه کاپي یې پژواک اژانس ته هم لیږل شوې پکې راغلي دي چې د ډیورنډ کرښه افغانانو ته تاریخي ارزښت لري.

سرچینې زیاته کړې چې دافغانستان دولت د یادې کرښې د مشروعیت په اړه د هر چا هر ډول څرګندونې ردوي .

خو د بهرنیو چارو وزارت په خبرپاڼه کې په دې اړه نور جزييات نه دي ورکړل شوي.

د افغانستان او پاکستان ترمنځ دنږدې دوه زره کیلو متره اوږده پوله په رسمي توګه په ۱۸۹۳ دافغانستان د و خت دبادشاه امیر عبدالرحمن خان او د انګریزانو داستازي سر مورټایمر ډیورنډ ترمنځ لاسلیک شوی و.

خو دافغانستان حکومت کله هم دا پوله په رسمیت ځکه نه دی منلی، چې انګریزانو دیوه قوم په سینه کې دا کرښه په غیر قانوني توګه راښکلې ده.