غزني ښار (پژواک ۴ لړم ۹۱): د غزني په مقر ولسوالۍ کې د ماين په چاودنه کې يوه مور له خپلې لور سره ووژل شوه او يو ماشوم زوى يې ټپي شو.
د غزني د والي مرستيال محمدعلي احمدي پژواک خبري اژانس ته وويل، چې دا چاودنه نن غرمه مهال د غزني د مقر ولسوالۍ د برو په سيمه کې رامنځ ته شوه.
د احمدي په وينا، وسلوالو طالبانو په ياده سيمه کې د سيمه ييز پوليسو د يوه قوماندان د کور مخې ته ماين ځاى پرځاى کړى وو او کله چې د دغه قوماندان مېرمن له دوو ماشومانو سره له کوره راوته، ماين چاودنه وکړه.
هغه زياته کړه، په دې پېښه کې ياده مېرمن له يوې کوچنۍ لور سره ووژل شوه او ۸ کلن زوى يې سخټ ټپي شوى دى.
سرچينه وايي، ټپي ماشوم د درملنې په موخه کابل ته لېږدول شوى دى.
د دې چاودنې مسووليت تراوسه پورې چا پر غاړه نه دى اخيستى.
نن سهار په غزني ښار کې هم، يوې چاودنې يو پوليس او يو د ملي امنيت کارکوونکى ټپيان کړل.
