کابل(پژواک١١لړم٩١): د افغانستان د کورنيو چارو وزارت وايي ، چې په هېواد کې به د ټاکنو تر مهاله شاوخوا شپږ مېليون کسانو ته الکترونيکې تذکرې ووېشل شي.
ټاکل شوې ، چې د ولسمشرۍ او ولايتي شوراګانو ټاکنې د ١٣٩٣ کال د وري مياشتې په ١٦مه نېټه ترسره شي.
د کورنيو چارو وزارت امنيتي مرستيال جنرال عبدالرحمان رحمان تېره ورځ د ټاکنو د خپلواک کمېسيون له مشر سره په ګډه خبري ناسته کې وويل،چې د روان کال په مرغومي مياشت کې به د الکترونيکي تذکرو وېش پيل شي.
رحمن وويل،چې د کورنيو چارو وزارت به ددې تذکرو د وېش لپاره په ټول هېواد کې ٤٠٠ ډلې په دندو و ګوماري.
ده ددې پروسې ټول لګښت ١١٠ مېليونه امريکايي ډالره ياد کړ.
هغه وويل ، چې د الکترونيکي تذکرو وېش د کورنيو چارو او مخابراتو وزارتونو ګډه پروژه ده او دا مهال په دې وزارتونو کې د يادې پروژې لپاره د کاري وړتياوو پر لوړولو کار روان دى.
د ټاکنو د خپلواک کمېسيون مشر فضل احمد معنوي وويل ، چې د الکترونيکي تذکرو وېش به ددې کمېسيون سره د ټاکنو د روڼوالي په موخه د رايو ورکوونکيو د نوملړ په برابرولو کې مرسته وکړي.
د ولسمشرۍ د ١٣٨٨ کال د ټاکنو لپاره ١٧،٥ مېليون تنه د رايو ورکولو وړ اټکل شوي وو ، خو له دې ډلې څخه پنځه مېليون تنو په ټاکنو کې ونډه واخيسته.
د افغانستان نفوس شاوخوا ٢٦ مېليون تنه اټکل شوى دى .
