جلال اباد (پژواک ١٣ لړم ٩١): د لغمان د دارالعلوم استاد مولوي نصير د ناپېژانده وسلوالو په بريد کې ووژل شو.
د لغمان د والي وياند سرحدي ځواک پژواک خبري اژانس ته وويل، چې مولوي نصير نن سهار نهه نيمې بجې د مهترلام اړوند د چهل مټۍ په سيمه کې د ناپېژانده وسلوالو په بريد کې وژل شوى دى.
ځواک زياتوي، چې مولوي نصير د شهباز کلا اوسېدونکى دى او دارالعلوم ته په لاره و، چې بريد پرې وشو.
هغه وايي، چې د پېښې په تړاو يې څوک نه دي نيولي خو په اړه يې پلټنې پيل کړې دي.
عيني شاهد نبي ګل وايي، چې په سيمه کې يې د مولوي نصير مړى ليدلى دى.
د پوهنې وزارت په يوه خبرپاڼه کې پر ياد استاد بريد غندلى او ويلي يې دي: “د پوهنې وزارت … د استاد له کورنۍ سره غمرازي ښيي او په دې باور دی چې دغه کار د افغانستان دښمنانو ترسره کړی دى.”
د سرچينې د معلوماتو له مخې، مولوي نصير ۴۲ کاله وړاندې په لغمان کې زېږېدلى او له تېرو نهو کلونو را هيسې يې د لغمان په مرکزي دارالعلوم کې د ديني زده کړو د استاد په توګه دنده ترسره کوله .
د دغه بريد مسووليت تر دې دمه چا پر غاړه نه دى اخيستى.
